"Sülh prosesi Azərbaycanın irəli sürdüyü təkliflər əsasında həyata keçirilir"
"Azərbaycan dövlətinin Qarabağ məsələsində sülh tərəfdarı olduğu və hər zaman sülh prosesinin inkişafına verdiyi töhfələr açıq-aydın görünür". Bu fikri Yeni Azərbaycan Partiyasının İdarə Heyətinin üzvü, politoloq Asif Əsgərli saytımıza bildirib.
Asif Əsgərli deyib ki, Ermənistanın Qarabağ məsələsində laqeyd münasibəti və qeyri-konstruktiv mövqeyi bu ölkənin çirkin məqsədlərindən xəbər verir: "Ermənistan məcburi olaraq sülhə gətrilib. Bunun üçün zaman ehtiyac var idi. Prezident İlham Əliyev İtaliyanın “İl Sole 24 Ore” qəzetinə müsahibəsində bu haqda danışaraq regionda baş verən bir çox dəyişiklikləri və dinamikanı aydın təsvir edib. Cənab Prezident "Biz bildirdik ki, bizim sülhə, sülh sazişinə ehtiyacımız var. Bununla razılaşmaq üçün Ermənistana təqribən iki il lazım oldu" deyib. Ölkə başçısı əldə olunan sülh razlaşmasında Brüsseldəki üçtərəfli görüşün də əhəmiyyətini vurğulayıb. Prezident hesab edir ki, bir neçə ay ərzində sülh sazişini yekunlaşdırıb imzalamaq olar: "Ermənistan tərəfi eyni iradə nümayiş etdirsə, zənnimcə, bu, realdır. Biz sülh sazişinin üzərində qurulmalı olduğu beş baza prinsipini irəli sürdük və Ermənistan bunu qəbul edib". Göründüyü kimi, sülh prosesi Azərbaycanın irəli sürdüyü təkliflər əsasında həyata keçirilir. Geopolitik olaraq Azərbaycan öz istəklərini Ermənistana diqtə edir. Qarşı tərəfin başqa çıxış yolu yoxdur. Ermənistan Azərbaycanın təklif etdiyi baza prinsiplərini artıq qəbul edib. Çox müsbət haldır ki, Qarabağ məsələsində vəziyyət sülhə doğru inkişaf edir. Azərbaycan və Ermənistan xarici işlər nazirləri praktiki danışıqlara başladıqdan sonra sülh sazişi ilə bağlı proses daha da sürətlənəcək".