İslamofobiya irqçiliyin spesifik formasıdır və onunla mübarizə aparmalıyıq. Müsəlmanlar məşğulluq, təhsil, peşə təhsili, xidmət və siyasi həyatda iştirak etmək kimi müxtəlif sahələrdə ayrı-seçkilik, stiqmatizasiya və təcrid olunma ilə yanaşı, irqçi zorakılıqdan əziyyət çəkirlər.Aparılan araşdırmalara görə, Avropada ümumi əhalinin 6 faizini təşkil edən təxminən 19 milyon müsəlman yaşayır.AZƏRTAC xəbər verir ki, bu fikirləri Azərbaycanın AŞPA-dakı nümayəndə heyətinin üzvü Fazil Mustafa qurumun payız sessiyası çərçivəsində “Avropada islamofobiya və antimüsəlman irqçiliyi ilə bağlı maarifləndirmə və onlara qarşı mübarizə” adlı məruzənin müzakirələri zamanı söyləyib.Milli Məclisin deputatı bildirib ki, şəriət qanunlarından istifadə etməyənlər belə etnik mənşəyinə, mənsubiyyətinə görə ayrı-seçkiliklə üzləşirlər. Müsəlman qadınlar, xüsusən də dini paltarlar geydikdə islamofobiyaya məruz qalırlar. Onlar gender, dini, etnik mənsubiyyəti, sosial və miqrant keçmişlərinə görə incidilirlər. Bəzi ölkələrdə qanunla dini geyimlərə ümumi qadağaların qoyulması hicablı qadınlara qeyri-mütənasib şəkildə təsir edir. Bu qadağa dini geyimlər geyinməyi seçən qadınların ifadə azadlığı hüququnu tapdalayır.

Avropa İttifaqının irqçilik və ayrı-seçkiliyə qarşı qanunlarının olduğunu xatırladan F.Mustafa islamafobiya ilə mübarizəyə dair milli strategiyaların hazırlanmasını və müsəlmanların inteqrasiyasını təşviq etməyə çağırıb. Onun sözlərinə görə, belə bir strategiya Avropada islamofobiya ilə mübarizə və müsəlmanların hüquqlarının qorunması üçün üzv dövlətlərdə bu istiqamətdə siyasi addımlar atılmasını təmin etmək üçün mühüm vasitə olacaq.