Azərbaycanın Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzində 20 Yanvar faciəsinin 36-cı ildönümünə həsr olunmuş Azadlığın qanla yazılan səhifəsi adlı anım mərasimi keçirilib.
Tədbirdə səfirliyin əməkdaşları, Özbəkistanın elm, mədəniyyət və incəsənət xadimləri, diaspor nümayəndələri, ictimaiyyət üzvləri, tələbələr və jurnalistlər iştirak ediblər. 
Əvvəlcə mərasim iştirakçıları Azərbaycan Mədəniyyət Mərkəzinin foyesində təşkil olunan "İstiqlaliyyətə gedən yol" adlı fotosərgi ilə tanış olublar.
Azərbaycanın Özbəkistandakı səfiri Hüseyn Quliyev çıxışında 20 Yanvar tarixinin Azərbaycan xalqının tarixində xüsusi və əlamətdar yer tutduğunu bildirib. O qeyd edib ki, bu hadisə yalnız faciə kimi deyil, eyni zamanda xalqımızın azadlıq və müstəqillik iradəsinin parlaq ifadəsi, milli oyanış və özünüdərk prosesinin mühüm mərhələsi kimi qiymətləndirilməlidir. Səfir vurğulayıb ki, 20 Yanvar hadisələri Azərbaycan xalqının haqq və ədalət uğrunda mübarizə əzmini bütün dünyaya nümayiş etdirib. Hüseyn Quliyev bildirib ki, həmin hadisələr zamanı günahsız insanların həyatını itirməsi böyük faciə olmaqla yanaşı, xalqın mübarizə ruhunu sındıra bilməmişdir. O qeyd edib ki, şəhidlərin xatirəsi Azərbaycan dövləti və xalqı tərəfindən daim uca tutulur, onların fədakarlığı müstəqil Azərbaycan dövlətinin möhkəmlənməsində mühüm mənəvi dayaqlardan biridir.
Azərbaycan Mədəniyyət Mərkəzinin direktoru Akif Marifli çıxışında 20 Yanvarın Azərbaycan xalqının həm dərin faciəsi, həm də qəhrəmanlıq və milli iradə salnaməsi olduğunu vurğulayıb. O bildirib ki, həmin gün xalqımız ağır siyasi və mənəvi sınaqlarla üzləşsə də, öz azadlıq ideallarına sadiqliyini qoruyub saxlamışdır. Direktor qeyd edib ki, Ümummilli Lider Heydər Əliyev 20 Yanvar faciəsinə ilk gündən etibarən prinsipial mövqe nümayiş etdirmiş, bu hadisələrə obyektiv siyasi və hüquqi qiymət verilməsinin əsasını qoymuşdur. Akif Marifli vurğulayıb ki, bu gün Azərbaycan Respublikasının Prezidenti İlham Əliyev tərəfindən də 20 Yanvar şəhidlərinin xatirəsinə xüsusi diqqət yetirilir, onların qəhrəmanlığı dövlət səviyyəsində ehtiramla yad edilir və gənc nəslin vətənpərvərlik ruhunda tərbiyəsində mühüm yer tutur.
Çıxış edən digər natiqlər - Daşkənd şəhər Şurasının deputatı, fəlsəfə elmləri doktoru, professor Cəmilə Şermuhamedova, Mirzə Uluqbey adına Özbəkistan Milli Universitetinin kafedra müdiri, fəlsəfə elmləri doktoru, professor Niginahon Şermuxamedova, Azərbaycanın "Xalq qəzeti"nin Türküstan üzrə xüsusi müxbiri, hadisələrin canlı şahidi, "Qara Yanvar" mövzusunda kitabların müəllifi Qulu Kəngərli, soydaşımız İsmayıl Məmmədov və başqaları 20 Yanvar hadisələrinin uzun illər sovet imperiyasının əsarətində yaşayan xalqın azadlıq səsinin ucalması ilə yadda qaldığını bildiriblər. Onlar vurğulayıblar ki, bu faciədən sonra Azərbaycan xalqının ictimai şüurunda və azadlıq ideyalarında ciddi dəyişikliklər baş vermiş, xalq müstəqillik uğrunda mübarizənin dönüş nöqtəsində vahid ideya ətrafında birləşmişdir.
Sonda Azərbaycan Mədəniyyət Mərkəzinin "Xarı Bülbül" teatr truppasının üzvləri 20 Yanvar faciəsinə həsr olunan şeirlər səsləndiriblər.