"Vətən müharibəsində Qubadlı rayonunun azad edilməsi müharibənin gedişində əhəmiyyətli dönüş yaratdı. Oktyabrın 25-də Azərbaycan Silahlı Qüvvələri şəhəri düşməndən təmizləyiblər.  Azərbaycan Ordusunun sentyabrın 27-də Qarabağda başladığı uğurlu əks-hücum əməliyyatı nəticəsində noyabrın 9-dək Qubadlı şəhəri və rayonun 41 kəndi azad olunub. Bu haqda Korrupsiyaya Qarşı Mübarizə Mərkəzi İctimai Birliyinin sədri Səadət Məhərrəmova fikirlırini bizimlə bölüşüb. 
Səadət Məhərrəmova bildirib ki, Qubadlı şəhərinin azad edilməsi böyük Qələbəni yaxınlaşdırdı: “Cənab Prezidentin Qubadlıda Azərbaycan bayrağını ucaldması hər birimizi qürurlandırıb. Bu gün Qubadlı yeni inkişaf dövrünü yaşayır. Artıq Qubadlı şəhərinin baş planı təsdiqlənib. Müzəffər Ali Baş Komandan İlham Əliyev azad olunmuş Qubadlıya bir neçə dəfə səfər edərək Xanlıq-Qubadlı yolunun təməlqoyma mərasimində, “Qubadlı” yarımstansiyasının açılışında, Qubadlı rayonunda Dövlət Sərhəd Xidmətinin yeni hərbi hissə kompleksinin açılışında iştirak edib. Cənab Prezident deyib ki, Qubadlı rayonu ölkəmizin ən gözəl rayonlarından biridir və qısa müddət ərzində lazım olan bütün bərpa işləri də nəzərdə tutulur. Oktyabrın 19-da Prezident İlham Əliyev və birinci xanım Mehriban Əliyevaya Qubadlı şəhərinin Baş planı təqdim edilib. Daha sonra cənab Prezident və birinci xanım İşğal və Zəfər muzeyləri kompleksinin təməlini qoyublar. Bu muzey kompleksi Azərbaycan xalqının tarixi ədalətin və öz ərazi bütövlüyünün bərpası uğrunda göstərdiyi döyüş əzmini, misilsiz qəhrəmanlığını, o cümlədən 44 günlük Vətən müharibəsi zamanı qazandığı möhtəşəm Qələbəni indiki və gələcək nəsillərin yaddaşına həkk edərək əbədiləşdirən, haqq səsimizi dünyaya çatdıran təşviqat və informasiya mərkəzi olacaq”.