Bir müddət əvvəl, Rusiyanın “Nasionalnaya Oborona” jurnalının baş redaktoru, tanınmış hərbi ekspert İqor Korotçenko qeyd edib ki,  Qarabağ ermənilərinin statusu Azərbaycan vətəndaşı olmaqdır. O qeyd edib ki, onların yalnız bir statusu ola bilər – o da, Azərbaycan vətəndaşı!

"Xeber 7" məlumat verir ki, Politoloq Ramiz Alıyev Bizimyol.info xəbər portalına açıqlamasında deyib ki, bütün hüquq normaları, dünyada insan haqqları ilə bağlı sənədlərdə, qətnamələrdə  göstərilir ki, ölkə ərazisində yaşayan bütün xalqlara diqqət olmalıdır.

“Bütün millətlərə dövlətlər öz ölkəsində birmənalı davranmalıdır. Vətəndaşlarına göstərmiş olduğu diqqət və qayğını həmin xalqlara, millətlərə də göstərməlidir. Azərbaycan tək regionda deyil, dünyada da tolerant bir ölkə kimi tanınır.

Bilirsiniz ki, Azərbaycanda bir çox xalqların, millətlərin nümayəndələri yaşayır və qardaş xalq, qardaş millət olaraq münasibətlərimiz var. Bütün dövrlərdə olduğu kimi 2020- ci il Vətən müharibəsində də, Birinci Qarabağ Müharibəsində də Azərbaycan öz ərazi bütövlüyünü təmin etməklə bağlı Azərbaycanda yaşayan digər xalqların nümayəndələri də,  Azərbaycan uğrunda döyüşə atıldılar. Ərazi bütövlüyümüzün bərpa olunmasında müstəsna xidmətlər göstərdilər.

Eyni zamanda Azərbaycan dövləti də həmin igidlərə digər vətəndaşlarımız kimi eyni münasibəti sərgiləyib, onlara da xüsusi medallar, ailə üzvlərinə  diqqət və qayğı göstərdi”-deyən politoloq qeyd eidb ki, Azərbaycanda kimin hansı millətə mənsub olmasına baxmayaraq, hamı özünü azərbaycanlı sayır.  Azərbaycanlı olduğu ilə də fəxr edir.

Politoloqun fikrincə,  Azərbaycan dünyada tolerant ölkə olaraq tanınır. Xankəndidə və digər ərazilərimizdə yaşayan erməni əsilli vətəndaşlarımız mütləq şəkildə Azərbaycan Respublikasının vətəndaşı olacaq, başqa yolu yoxdur.  Onların başqa statusu ola bilməz.

“Azərbaycanda hal-hazırda yaşayan ermənilər var,  Bakıda, Sumqayıtda, Gəncədə Azərbaycanın başqa bölgələrində yaşayan ermənilər var.

Onlar Azərbaycan vətəndaşlarıdır və bugünə kimi onlar milliyətinə görə heç bir problemlə üzləşməyiblər.

Onlara digər vətəndaşlarımız, nə də dövlət orqanları tərəfindən heç bir təzyiq olmayıb. Azərbaycanda hazırda 30 minə yaxın erməni yaşayır.

Xankəndi və digər bölgələrimizdə yaşayan ermənilər Azərbaycan vətəndaşlığını qəbul etdikdən sonra onlar da Azərbaycan vətəndaşlarının hüquqlarına sahib olacaqlar”.

Bu gün Azərbaycan Respublikasının vətəndaşlarının yaşam tərzinə, hüquqlarına baxsaq və sonra da Ermənistanda yaşayan erməni vətəndaşlarının hüquqlarına, dolanışığına, həyat tərzinə nəzər salsaq, mənfi mənada fərqi çox açıq şəkildə görərik. Azərbaycan vətəndaşı olmaq onlar üçün bir fəxr hissi olmalıdır, yəqin ki onlar da bunu başa düşür.

Xatırlayırsınızsa, bir neçə dəfə Xankəndidə və digər ərazilərimizdə yaşayan ermənilər Azərbaycan Respublikasının prezidenti İlham Əliyevə müraciət etmişdilər ki, “Biz Azərbaycan Respublikası vətəndaşlığını qəbul edirik”.

Cənab prezident də bütün çıxışlarında qeyd edib ki, orada yaşayan erməni əsilli vətəndaşlar bizim vətəndaşlarımızdır və biz onlara sahib çıxacağıq.

Onları digər vətəndaşlarımızla eyni statusda görmək istərdik və görəcəyik də. Onlar da bizim vətəndaşlarımız olaraq, Azərbaycan Respublikasının digər şəhər və rayonlarında da yaşamaq hüququna malik olacaqlar.

İradə Cəlil