“Ermənistan rəhbərliyi və rəsmiləri  çıxışlarında adətən Zəngəzur dəhlizinin açılmasına mane olmadıqlarını bildirirlər”.

"Xeber 7" məlumat verir ki, bu fikirləri Editor.az-a açıqlamasında politoloq Ramiz Alıyev deyib.

“Bu məsələ sadəcə bəyanatlardan o tərəfə, əməli addımlara keçə bilmir. Əgər özlərinin də etiraf etdiyi kimi kommunikasiyaların açılması gələcəkdə Ermənistanın, regionun inkişafı üçün yeni bir mərhələ olacaqsə, Rusiya ilə birbaşa dəmiryol xəttinin açılmasına gətirib çıxaracaq və Naxçıvandan keçməklə İranla birbaşa dəmiryol xətti olacaqsa, niyə Ermənistan hərəkətə keçmir?  Baş nazir Nikol Paşinyan bunun səbəbini yaxşı bilir. Səbəb odur ki, proses sadəcə Paşinyanın əlində deyil. Məlumdur ki, Azərbaycan tərəfi Zəngəzur dəhlizinin açılması üçün üzərinə düşəni edir və etməyə də davam edir. Sadəcə tək Azərbaycan tərəfinin üzərinə düşən öhdəliklərlə məsələ bitmir. Ermənistan da buna əməl etməlidir.  Ermənistan rəhbərliyi özü qərar vermək imkanına malik deyil və kənardan verilən tezislər əsasında hərəkət edən hökumətdir”.

Politoloq qeyd edir ki, bu gün rəsmi İrəvan və region üçün Zəngəzur dəhlizinin açılması vacibdir:

” Naxçıvanla Azərbaycanın digər bölgələrinin birləşdirilməsi ilə bağlı alternativ variantlar var. Sadəcə burada dəhlizin açılması həm region, həm Avropa və Asiya üçün çox önəmlidir. Çox qısa vaxt ərzində Zəngəzur dəlizi açılacaq və razılaşmalarda qeyd olunan bəndlər öz həllini tapacaq. Ancaq Ermənistan rəhbərliyi düşünürsə ki, Fransa və ya başqa bir ölkə onlara kömək edəcək ki, manipulyasiyalar edərək yenə də aldadıcı manevrlərlə bu məsələdən yayınacaqlar və ya dünya ictimaiyyətini aldadacaqlar, yanlış edirlər. Özünün də qeyd etdiyi kimi Zəngəzur dəhlizinin açılması dalana dirənən Ermənistanı blokadadan çıxara bilər. Əgər bu baş verməyəcəksə, xalq gec-tez hakimiyyətlə hesablaşacaq. Paşinyanın parlamentdəki çıxışları nə xalqı, nə də dünya ictimaiyyətini aldada bilməz. Bununla o, yalnız özünü və tərəfdaşlarını aldadır”.

//Gülnarə Abasova, Editor.az