Pakistan və Azərbaycan arasında mövcud olan ikitərəfli münasibətlər dostluq, qarşılıqlı dəstək, səmimiyyət və ehtiram üzərində qurulmuşdur. İki ölkə arasında münasibətlər öz qloballığı və regional məsələlərin oxşarlığı ilə xarakterizə olunur. Pakistan Azərbaycanın müstəqilliyini tanıyan ilk dövlətlərdən biridir. Pakistan əsl qardaşlıq nümayiş etdirərək Azərbaycan torpaqlarını 30 il işğal altında saxladığına görə Ermənistanı dövlət kimi tanımamışdır. Azərbaycan da eyni zamanda Kəşmir məsələsində hər zaman Pakistanı dəstəkləmişdir. İki ölkə arasında tarixi bağlara əsaslanan münasibətlər ötən illər ərzində dinamik inkişaf yolu keçmiş, İkinci Qarabağ müharibəsində Pakistanın ölkəmizə göstərdiyi siyasi və mənəvi dəstək bu münasibətləri qırılmaz bağlarla möhkəmləndirmişdir. Belə ki, Pakistanda siyasi hakimiyyətdə kimin olmasından asılı olmayaraq, Azərbaycana olan münasibət birmənalı olaraq dəyişməz qalır. Əlbəttə, bu, ölkələrimiz arasında münasibətlərin gələcək inkişafı baxımından olduqca mühüm əhəmiyyət kəsb edir. Bütün bunları nəzərə alaraq, qeyd etməliyik ki, cənab Prezident İlham Əliyevin Pakistana səfəri və dövlətimizin Başçısına göstərilən yüksək səviyyəli münasibət ölkələrimiz arasında əlaqələrin yüksək səviyyədə olduğunu deməyə əsas verir.
Bu fikirləri saytımıza açıqlamasında VI çağırış Milli Məclisin üzvü Tamam Cəfərova deyib.
O, bildirib ki,  istər işğal dövründə, istərsə də 44 günlük Vətən müharibəsi və ondan sonrakı proseslərdə  Pakistan Azərbaycana dəstəyini açıq mətnlə nümayiş etdirmişdir. Bir məqamı xüsusilə xatırlatmalıyıq ki, 1993-cü il aprelin 30-da keçmiş Ermənistan - Azərbaycan Dağlıq Qarabağ münaqişəsi ilə bağlı BMT TŞ-nin 822 saylı qətnaməsinin qəbul edildiyi iclasa da məhz Pakistan sədrlik edib. Onu da qeyd etməliyik ki, Azərbaycan da Kəşmir məsələsində hər zaman Pakistana dəstəyini birmənalı olaraq nümayiş etdirmişdir. Prezident İlham Əliyevin də dediyi kimi “Cəmmu və Kəşmir məsələsində bizim birmənalı dəstəyimiz qardaşlığımıza, eləcə də beynəlxalq hüquqa olan sadiqliyimizdir. Kəşmirlilərin hüquqları onilliklər boyu diqqətdən kənarda qalmış, pozulmuşdur. BMT Təhlükəsizlik Şurasının qətnamələri məsələnin necə həll olunmasını aydın şəkildə təsvir edir. Lakin, əfsuslar olsun ki, BMT Təhlükəsizlik Şurasının qətnamələrinin icra mexanizmləri yoxdur”. 
Onu da deməliyik ki, 1994-cü ildə Ulu Öndər Heydər Əliyevin Pakistana səfəri ölkələrimiz arasında münasibətlərin inkişafına olduqca müsbət təsir etmişdir. Ötən dövr ərzində Prezident lham Əliyevin prezidentliyi dövründə də Azərbaycan və Pakistan arasında bir çox sahələrdə əməkdaşlıq imkanları geniş vüsət almış, xalqlarımız arasında mədəni əlaqələr daha da möhkəmlənmişdir.
Fikirlərinin davamı olaraq, VI çağırış Milli Məclisin üzvü Tamam Cəfərova Azərbaycan Respublikasının Prezidenti cənab İlham Əliyevin Pakistana dövlət səfəri iki ölkə arasında əlaqələrin inkişafına yeni təkan verəcəyini deyib. O bildirib ki, cənab Prezident İlham Əliyevin Pakistan İslam Respublikasının Prezidenti Asif Əli Zərdari ilə geniş tərkibdə görüşü zamanı qarşılıqlı maraq doğuran məsələlərlə yanaşı, iqtisadi-ticari əlaqələrin, investisiya sahəsində əməkdaşlığın daha da genişləndirilməsi məsələləri müzakirə olunub. Onu da qeyd edək ki, səfər çərçivəsində Azərbaycan ilə Pakistan arasında imzalanmış müxtəlif sahələri əhatə edən  15 adda sənəd qarşılıqlı əlaqələrin inkişafında mühüm rol oynayacaq.
Əminliklə deyə bilərik ki, Pakistan və Azərbaycan arasında əməkdaşlıq əlaqələrində qarşılıqlı anlaşma hökm sürür, istər ikitərəfli, istər çoxtərəfli məsələlərdə iki ölkənin mövqeləri üst-üstə düşür. Bu isə iki ölkənin beynəlxalq münaisbətlər sistemində bir-birinin mövqeyini müdafiə etməsi və gələcəyə birgə addımlaması baxımından olduqca mühüm amildir.