“Sentyabrın 1-də keçirilən Milli Məclisə seçkilər beynəlxalq standartlara uyğun, tam şəffaf şəkildə baş tutdu. Bu seçkilər bir daha göstərdi ki, Azərbaycan güclü demokratik ənənələrə sahibdir”.

Bu barədə “Gənclərin Həmrəyliyinə Dəstək” İctimai Birliyin sədri Məhəmməd Cəbiyev deyib.

İctimai Birliyin sədri bildirib ki, seçkilərin demokratik prinsiplərə uyğun keçiriləcəyi öncədən bəlli idi: 

“Azərbaycanın zəngin seçki təcrübəsi var. Seçkiqabağı təşviqat kampaniyasının paritet şəkildə təşkil edilməsi, bütün namizədlərə bərabər şəraitin yaradılması, səsvermə prosesinin təşkili ilə bağlı görülən işlər beynəlxalq standartara uyğun idi. Gözlənildiyi kimi, seçkilər ədalətli və şəffaf şəkildə keçirildi. Azərbaycan xalqı qanunverici orqanın növbəti çağırışını səsvermə hüququndan sərbəst şəkildə istifadə edərək, seçdi”.

M.Cəbiyev seçkidə gənclərin aktivliyinin xüsusilə diqqət çəkdiyini bildirib.

“Gənc kimi seçki prosesini yaxından izləyirdim. Çünki hər bir seçki ölkəmizin gələcək inkişafını müəyyənləşdirir və gələcəyimizin qurulmasında biz gənclərin iştirakı vacib amildir. Hesab edirəm ki, Azərbaycanın güclü təməllərə malik olan gələcəyi formalaşmaqdadır. Biz gənclər də seçkidə aktiv iştirak etməklə ölkəmizin idarəetməsində birbaşa iştirak edirik”, - o qeyd edib.

İctimai Birlik sədri parlament seçkilərinin ilk dəfə azad olunmuş ərazilərdə keçirilməsini tarixi hadisə adlandırıb.