31 avqust tarixində Azərbaycan Respublikası Gənclər Fondunun maliyyə dəstəyi, “Qızlar Bulağı” Uşaq, Yeniyetmə və Gənc Qızlara Təlim və Tədris Xeyriyyə Fondunun təşkilatçılığı ilə icra olunan “Rəqəmsal Gələcəyin Qızları” layihəsi çərçivəsində hazırlanmış elektron resursun təqdimatı baş tutdu.

Təqdimat tədbiri gənclər, ictimaiyyət nümayəndələri, müəllimlər və valideynlərin iştirakı ilə reallaşdırıldı. Tədbirdə layihə barədə ətraflı məlumat verildi, görülən işlər və əldə olunan nəticələr ictimaiyyətlə paylaşıldı.

Layihənin koordinasiyasını həyata keçirən Siraclı Mirsirac iştirakçılara layihənin ideyası və məqsədləri haqqında danışaraq qeyd etdi ki, bu təşəbbüsün əsas hədəfi uşaq, yeniyetmə və gənc qızların rəqəmsal texnologiyalar sahəsində savadlılığını artırmaq, onların yeni biliklərə çıxışını təmin etməkdir. Texniki məsələləri icra edən Altun Hacıməmmədov isə layihə çərçivəsində hazırlanan elektron resursun funksionallığı, istifadəsi və faydaları barədə ətraflı təqdimat etdi.

“Rəqəmsal Gələcəyin Qızları” layihəsi qızların rəqəmsal bacarıqlarını gücləndirməklə yanaşı, onların təhlükəsiz onlayn mühitdə davranış qaydaları ilə tanış olmasına da şərait yaratdı. Layihə müddətində iştirakçılara internet resurslarından düzgün və məqsədyönlü istifadə, şəxsi məlumatların qorunması, rəqəmsal alətlər vasitəsilə təhsil və inkişaf imkanları barədə biliklər verildi.

Eyni zamanda, layihə gənc qızların texnologiya sahəsində öz potensiallarını kəşf etməsi, onların gələcəkdə İKT yönümlü peşələrə maraq göstərməsi üçün mühüm bir stimul oldu.

Tədbirin sonunda iştirakçılar layihənin təşkilatçılarına və ekspertlərinə öz suallarını ünvanladılar, fikir mübadiləsi aparıldı. İştirakçılar bu cür layihələrin davamlı olaraq həyata keçirilməsinin vacibliyini vurğuladılar və təşəbbüsü yüksək qiymətləndirdilər.