“Hazırda Azərbaycanda rəqabətədavamlı gənc kadrlar formalaşdırmaqdadır. Bu, Prezident İlham Əliyevin həyata keçirdiyi kadr islahatlarının bariz nümunəsidir. Çünki biz müşahidə edirik ki, günü-gündən ölkənin gənc kadr potensialı gücləndirilir”. Bu fikirləri saytımıza Yeni Azərbaycan Partiyasının (YAP) İdarə Heyətinin üzvü, politoloq Asif Əsgərli bildirib.O deyib ki, dövlət idarəetmə sistemində ölkə başçısı tərəfindən gənc kadrlara yüksək etimad göstərilir: “Prezident İlham Əliyevin davamlı olaraq məmurlara tapşırıq və tövsiyələr verməsi, idarəetmdə kadr islahatının önəmli cəhətidir. Bu yaxınlarda Prezident İlham Əliyev Masallı, Lerik və Göygöl rayonlarının yeni icra hakimiyyəti başçılarını qəbul edərkən çox ciddi tapşırıqlar verdi. Ölkə başçısı qeyd etdi ki, idarəetmədə çox ciddi islahatlar aparılır, çox böyük təmizləmə işləri aparılır: “Bu işlərə rəvac verən və bəzi dövlət məmurlarını, yerli icra orqanlarını bu qanunsuz işlərə təhrik edən insanlar hakimiyyətdən uzaqlaşdırıldı. Hakimiyyət təmizlənir və insanlar da bunu görürlər. Ona görə siz dövlət məmurları kimi bu hallara çox ciddi fikir verməlisiniz”.Cənab Prezidentin bildirdiyi kimi, son vaxtlar ölkəmizdə gedən çoxşaxəli islahatlar, o cümlədən idarəetmə sahəsində aparılan islahatlar, həmçinin kadr islahatları bütün Azərbaycan ictimaiyyətinə bizim siyasətimizi göstərir, bizim niyyətimizi göstərir. Diqqət çəkən məqam odur ki, cəmiyyət tərəfindən dövlətin bu addımları, cənab Prezidentin kadr islahatları təqdir olunur”.Asif Əsgərlinin fikrincə, artıq ölkədə müxtəlif sferaların inkişafında gənclər aktivlik göstərirlər: “Cənab Prezident dəfələrlə çıxşılarında gənc kadrlara olan inam və etimadını açıq şəkildə bildirib. Kadr seçimində bu yanaşma təbii seçmə üsulu ilə aparılır. Bütün bunlar düşünülmüş və dövrün çağırışlarından irəli gəlir. Əlbəttə ki, aparılan kadr islahatları, gənclərin önə çəkilməsi perspektiv planları özündə əks etdirir.Ölkəmizdə idarəetmə sahəsində çox ciddi islahatların aparılması xüsusən regionlarda problemlərin həllini sürətləndirəcək. Artıq hər bir yerdə müasir idarəetmə qaydaları tətbiq olunur. Elə dövlətimizin həyata keçirdiyi siyasətin məqsədi də bundan ibarətdir. Bu gün vəzifə səlahiyyətlərini aşan və qanunsuz işlər görən məmurlara qarşı dövlət tərəfindən sərt davranış göstərilir. Qanunsuz işlərlə məşğul olmaq istəyənlər anındaca cəzalandırılır”. Politoloqun sözlərinə görə, müasir düşüncəli yeni kadrlara vəzifələrin verilməsi cəmiyyətin dövlətə və Prezidentə inamını daha da artırır: “Bu yenilənmə prosesi məmur-vətəndaş münasibətlərini də dəyişib. Yeni kadrlar kabinetlərdə deyil, cəmiyyət arasında, səyyari qəbullarda daha çox görünürlər. Ölkə başçısının kadr islahatlarının əsas mahiyyəti məmurlara cəmiyyətin inamını artmasıdır. İnanırıq ki, Cənab Prezidentin idarətemə sistemində bu islahatları Azərbaycanın dayanıqlı inkişafına böyük təkan verəcək”.