Avqustun 23-də Beynəlxalq Münasibətlərin Təhlili Mərkəzində (BMTM) “Laçın: Postmünaqişə dövrünün yeni mərhələsi” adlı dəyirmi masa keçirilib.AZƏRTAC xəbər verir ki, mərkəzin İdarə Heyətinin sədri Fərid Şəfiyev artıq Laçın şəhərinə nəzarətin Azərbaycana keçdiyini deyib. O bildirib ki, 1992-ci ilin mayında Şuşa və Laçının işğalı böyük faciə idi. Laçının statusu həmişə danışıqlar zamanı xüsusi yer tuturdu. Minsk qrupu çərçivəsində də Laçın məsələsi ayrı bir maddə kimi müzakirə olunurdu. Artıq Minsk qrupu fəaliyyət göstərmir, amma vaxtaşırı beynəlxalq ekspertlər Laçın məsələsini gündəmə gətirirdilər. Bu gün təşkil olunan dəyirmi masada müzakirələrlə buna aydınlıq gətirmək istəyirik.BMTM-in İdarə Heyətinin üzvü Esmira Cəfərova Laçının strateji cəhətdən önəmini qeyd edib. Diqqətə çatdırılıb ki, Ermənistan üçtərəfli Bəyanatdakı öhdəlikləri yerinə yetirməkdən yayınır. Ancaq Laçın şəhəri, Zabux və Sus kəndlərində yaşayanların mütləq əksəriyyəti Yaxın Şərq ölkələrindən gətirilmiş ermənilərdir, onlar bu torpaqları tərk etməlidirlər.BMTM-in aparıcı məsləhətçisi Mətin Məmmədli nəzərə çatdırıb ki, Laçın Qarabağın qapısıdır. Laçın şəhəri hər zaman Azərbaycanın tarixi ərazisi olub. Laçındakı toponimlər də təsdiq edir ki, bu ərazilər etno-mədəni baxımından bizə məxsus olub.Ermənilər sovetlər dövründə də Qarabağla Ermənistan arasında maneə saydıqları Laçının statusunu ləğv etməyə çalışıb, buna nail ola bilməyiblər. Bu günlərdə Laçın şəhəri, Zabux və Sus kəndlərinin Azərbaycanın nəzarətinə keçməsi ümumən Cənubi Qafqazda təhlükəsizlik mühitinə böyük töhfə verəcək.Politoloq Zaur Məmmədov ermənilərin əsrlərdir ki, Laçını ələ keçirməyə çalışdıqlarını söyləyib. Politoloq qeyd edib ki, Laçın rayonunun Azərbaycana qaytarılmasına dair öhdəlik üçtərəfli Bəyanatda əksini tapıb. 1994-cü ildən sonrakı dövrlərdə aparılan sülh danışıqlarında da, həmçinin Laçın xüsusi yer tuturdu.Tədbir müzakirələrlə davam etdirilib.