Bu gün Avropa Şurası Parlament Assambleyasında Azərbaycana qarşı təşkil edilmiş belə proseslər Avropa Şurasının, eləcə də bütövlükdə Avropanın mənafeyinə ziddir. Əslində, ilk növbədə, elə Ermənistanın maraqlarının əleyhinədir. Feyk foto və videolardan tutmuş, müxtəlif beynəlxalq təşkilatlarda, o cümlədən Avropa Şurasında Azərbaycana qarşı başladılan bu kampaniya bir çirkli ssenaridir. Bütün bunların uğursuz tamaşa olduğunu hər kəs aydın görür. Azərbaycanın Avropanın enerji təhlükəsizliyini təmin etmək istiqamətindəki rolu və əhəmiyyəti son dövrlərdə kəskin şəkildə artıb. Ermənistanla Azərbaycan arasında yekun sülh razılaşmasının əldə olunması istiqamətində intensiv iş gedir. Artıq Fransanın və Avropa İttifaqı Şurasının prezidentləri vasitəçilik missiyası ilə ən aktiv şəkildə bu prosesdədirlər. Elə onların və Ermənistanla Azərbaycan rəhbərlərinin ötən həftə baş tutmuş görüşü də buna əyani sübutdur.Bu fikirləri AŞPA-dakı nümayəndə heyətimizin üzvü Rafael Hüseynov qurumun payız sessiyasında “Azərbaycan və Ermənistan arasında hərbi əməliyyatlar, xüsusilə mülki yaşayış məntəqələrinə və infrastruktura zərbələr” adlı cari məsələyə dair müzakirələrdə çıxışında söyləyib.Proseslər belə bir məcrada getdiyi halda qəfildən stəkanda fırtına yaratmaq nəyə xidmət edir? Niyə Azərbaycana qarşı bu çoxistiqamətli, həm də iftiraya, yalana, saxtakarlığa əsaslanan həmlələr edilir? Həm də niyə bu taetrlaşdırılmış siyasi oyun məhz indi baş verir? kimi sualların cavabının sadə olduğunu deyən R.Hüseynov bildirib ki, həmin sadə cavablar digər “Bütün bunlar kimin marağındadır?” sualı ilə bilavasitə bağlıdır. Qeyd edib ki, Avropanın enerji təhlükəsizliyinin təmin edilməsində Azərbaycanın verə biləcəyi töhfələrə qarşı belə siyasi iftiralar təkcə Azərbaycan əleyhinə işləmir. İlk növbədə, elə Avropaya qarşı fitnəkarlıqdır. Guya Ermənistanın halına yanan və belə qondarma yollara əl atanlar, əslində, Ermənistanın və erməni xalqının əleyhinə işləyirlər. Məcburən ya bilməyərəkdən, yaxud səhv yönəldilərək bu xəstə axına qoşulanlar arasındakı erməni deputatlar, əslində, özlərinin milli maraqlarına əks getdiklərini niyə dərk etmək istəmirlər? Əksinə, düzgün olmayan impulsiv davranışları ilə araqarışdıranların işinə rəvac verirlər. Özünün Azərbaycana qarşı 30 illik təcavüzkarlıq stajı olan ölkənin indi öz torpaqlarını azad etmiş Azərbaycana işğalçı deməsi gülməlidir.“Təxribat məqsədilə Azərbaycana qarşı silahlı hücumlar edən və hələ delimitasiyası aparılmamış həmsərhəd bölgələrdə ağır məğlubiyyətə düçar olan Ermənistan, hadisələrin mahiyyətindən bixəbər olanları inandırmağa çalışır ki, guya onların “torpağı” zəbt edilib. Həmin uydurmanı daha geniş çərçivədə tirajlamaq üçün səy göstərirlər. Assambleya rəhbərliyinə bu barədə məktub göndərir və ardınca da təzyiqə keçirlər. Eyni məktubu Assambleya rəhbərliyinin nə qərara gələcəyini gözləmədən siyasi qruplara, bütün komitələrə yollayırlar. Çünki hazırda Azərbaycana qarşı canfəşanlıq edən şəbəkənin məqsədi məhz indiki dövrdə bacardıqca gərginliyi artırmaqdır. Tapşırıq belə verilib. Ssenaridə belə yazılıb. Assambleyada eyni tora düşənlərə müraciət edirəm. Heç vəchlə yol verməyin ki, sizi siyasət şahmatının qara işləri yerinə yetirən piyadalarına çevirsinlər. Onsuz da bu başladılan çürük kampaniya da lap tezliklə iflasa uğrayacaq. Feyk informasiya şəbəkəsi darmadağın ediləcək. Azərbaycanın heç bir ölkəyə qarşı torpaq iddiası yoxdur. Ermənistanın 30 il ərzində işğal altında saxlayaraq xarabalığa çevirdiyi, indi azad etdiyimiz torpaqlarımıza yenidən həyat verməyimizə, o yerləri dirçəltməyimizə mane olmayın. Ermənistanla Azərbaycan arasında gedən danışıq prosesini pozmayın. Yaxınlaşan böyük sülhün qarşısını almayın. Azərbaycanın Avropanın enerji təhlükəsizliyinə verəcəyi faydaların əngəllənməsinə gətirib çıxaran hərəkətlərdən çəkinin”, - deyə avropalı parlamentariləri rasional olmağa çağırıb.

Vurğulayıb ki, yüzlərlə qondarma məktub və feyk videolar, fotolar, riyakar bəyanat və çıxışlar həqiqətin qarşısında acizdir. Qalib Azərbaycanı böyük yolundan heç bir qüvvə döndərə bilməz. Belə hərəkətlər bu yalana və saxtakarlığa dəstək olan hər kəsin, eləcə də Assambleyanın nüfuzuna xələl gətirir. Belə təhriklərə uyub düz yoldan azmaq olmaz. Tanrı həqiqəti qorusun! Və əlbəttə ki, qoruyacaq!