Aydın Hüseynov: “İki dövlət arasında əməkdaşlığın daha da irəliyə daşınması vacib idi”

Milli Məclis Azərbaycanın Albaniya və Keniya ilə yanaşı İsraildə də səfirlik açmasına razılıq verib. Bununla bağlı məsələlər parlamentin bu gün keçirilən iclasında müzakirəyə çıxarılıb.
İclasda həmçinin “Azərbaycan Respublikasının Fələstin Dövlətində (Ramallah şəhərində) Təmsilçilik Ofisinin təsis edilməsi haqqında” qanun layihəsi də müzakirəyə çıxarılıb. Müzakirələrdən sonra layihələr səsverməyə çıxarılaraq qəbul edilib.
Buna münasibət bildirən millət vəkili Aydın Hüseynov xalqcəbhəsi.az-a açıqlamasında deyib ki, Azərbaycanın İsraildə səfirlik açması önəmli hadisədir və milli maraqlarımızı özündə ehtiva edir. Millət vəkili əlavə edib ki, İsraildə səfirliyin açılması ilə bağlı sənəd Prezident cənab İlham Əliyev tərəfindən təqdim olunub: “Azərbaycan eyni zamanda Fələstində də Təmsilçilik Ofisini açacaq. Azərbaycan bir çox müsəlman ölkələrindən fərqli olaraq İsraildə səfirlik açmaqla yanaşı Fələstində də Təmsilçilik Ofisi açır.
Hər kəsə bəllidir ki, İsrail Azərbaycanla sıx əlaqələrə malik dövlətdir və daim bizi beynəlxalq platformalarda dəstəkləyib. Həmişə olduğu kimi 44 günlük Vətən Müharibəsində də bəzi ölkələrdən fərqli olaraq İsrailin tam dəstəyini gördük. Bu gün Azərbaycan İsraillə bir çox sahələrlə yanaşı, hərbi sahədə də əməkdaşlıq edir. İki dövlət arasında əməkdaşlığın daha da irəliyə daşınması vacib idi. Təl-Əvivdə səfirliyimizin fəaliyyətə başlamasından sonra münasibətlərimiz daha da inkişaf edəcək”.