“Ekofəalların aksiyasının başlama səbəbi Qarabağ ərazisində yerləşən faydalı qazıntı yataqlarında monitorinqlərin həyata keçirilməsi tələbi ilə çıxış edən Azərbaycan tərəfinə imkan yaradılmaması idi. Bu məqsədlə yaradılmış monitorinq qrupunun həmin əraziyə buraxılmaması üçün Ermənistan tərəfindən göstərilən cəhdlər, eyni zamanda sülhməramlı qüvvələrin bu məsələ ilə bağlı hər hansı bir tədbir görməməsi Azərbaycan ictimaiyyətini, ekofəalları aksiyaya sövq etdi. Aksiyadan sonra Qarabağ ərazisində Qızılbulaq qızıl yatağı, Dəmirli mis yatağında Ermənistanın qeyri-qanuni gördüyü işlərə tam nəzarəti bərpa etmək üçün önəmli addımlar atıldı”. Bu sözləri SİA-ya açıqlamasında “Cəmiyyətin İnkişafı” Mərkəzinin sədri Əhməd Abbasbəyli deyib.

Onun sözlərinə görə, bu aksiyanın digər bir məqsədi də Qarabağa ermənilər tərəfindən qanunsuz şəkildə silah-sursatın daşınmasının qarşısınının alınması və ora gedən avtomobillərin hərəkətini nəzarətdə saxlamaq idi: “Bu məsələni körükləyən, aqressivlik nümayiş etdirən tərəf də Rusiyanın vassalı, məşhur fırıldaqçı Ruben Vardanyan idi. Təbii ki, Vardanyan o əraziyə boş yerə göndərilməmişdi. Onun missiyası vəziyyəti gərginləşdirməkdən, o ərazinin Azərbaycanın tam nəzarəti altına keçməsinin qarşısını almaqdan və bu prosesi uzatmaqdan ibarət idi. Məhz elə bu fəaliyyətin nəticəsidir ki, həmin ara qarışdıran Qarabağdan uzaqlaşdırıldı. Bu bir üstünlük oldu ki, Vardanyan missiyasını müəyyən mənada yerinə yetirə bilmədi”.

Sədr sözlərinə davam edərək bildirib ki, ekofəalların aksiyasının nəticəsi olaraq bu yol vasitəsi ilə silah-sursat daşınmasının qarşısı alındı: “Daha sonra Ermənistan tərəfi artıq alternativ yollar axtarmağa və o yollardan istifadə etməyə başladı. Bu da bizim yeni bir müstəviyə keçməyimizə səbəb oldu. Yəni, bunun özü də bir müsbət nəticədir. Artıq həmin alternativ yoldan silah-sursat daşınmasının qarşısını almaq üçün tədbirlər görülməyə başlandı. Görülən tədbirlər də öz nəticəsini verdi. Demək olar ki, həmin ərazilər də Azərbaycan Silahlı Qüvvələrinin nəzarətinə keçdi.

Bu aksiyalar nəticəsində istər Avropa İttifaqı, istərsə də ayrı-ayrı dövlətlər tərəfindən bizə qarşı təzyiqlər artdı. Bu məsələdə bizə qarşı müəyyən qərarlar da qəbul edildi. Göstərilən təzyiqlərin heç bir nəticəsi olmadı. Bu o deməkdir ki, biz tutduğumuz yolda haqlıyıq. Beynəlxalq aləmə də bu aksiyaların məqsədi və məramını izah etməyi bacardıq”.