XI Qlobal Bakı Forumunda iştirak etməklə əlaqədar Bakıda səfərdə olan Rumıniyanın sabiq Prezidenti, Nizami Gəncəvi Beynəlxalq Mərkəzinin İdarə Heyətinin üzvü, Buxarestdə fəaliyyət göstərən Levanta Mədəniyyəti və Sivilizasiyasının Tədqiqi üzrə Təkmilləşdirmələr İnstitutunun rəhbəri, "Azərbaycanım” beynəlxalq jurnalının Redaksiya Şurasının fəxri üzvü və beynəlxalq jurnalın təsis etdiyi "Azərbaycanın Dostu” qızıl ordeninin laureatı Emil Konstantinesku "Azərbaycanım” beynəlxalq jurnalının kollektivi ilə görüş keçirib. 

Görüş "Azərbaycanım” beynəlxalq jurnalının Redaksiyasında baş tutub. Rumıniyanın sabiq Prezidenti Emil Konstantineskunu salamlayan beynəlxalq jurnalın baş redaktoru, Beynəlxalq Elmlər Akademiyasının müxbir üzvü Emil Nəsirli bildirib ki, Azərbaycan müstəqillik əldə etdikdən sonra dövlətlərarası ikitərəfli münasibətlərin coğrafiyası genişlənmiş və Rumıniya Azərbaycanın müstəqilliyini 1991-ci il dekabrın 11-də tanımışdır. 1995-ci ilin iyulunda Azərbaycan Respublikasının Prezidenti Heydər Əliyev Rumıniyaya rəsmi səfər etmiş və Rumıniyaya səfəri zamanı Azərbaycan və Rumıniya arasında dostluq və əməkdaşlıq münasibətləri haqqında Bəyannamə, eləcə də elm, təhsil, mədəniyyət və idman, həmçinin iqtisadi və elmi-texniki əməkdaşlıq haqqında sazişlər imzalanmışdır.

Baş redaktor Emil Nəsirli məlumat verib ki, qarşılıqlı əlaqələrin təzahürü olaraq 1997-ci ildə Rumıniyanın Azərbaycanda səfirliyi, 2001-ci ildə isə Şərqi Avropa dövlətlərində ilk dəfə olaraq Azərbaycanın Rumıniyada səfirliyi açılmışdır. 1998-ci il iyunun 29-da Rumıniya Prezidenti Emil Konstantinesku Heydər Əliyevin dəvətilə Azərbaycana rəsmi səfəri zamanı "Azərbaycan Respublikası ilə Rumıniya Respublikası arasında dostluq münasibətlərinin və tərəfdaşlığın inkişafı haqqında" bəyannamə imzalanmışdır.

Emil Nəsirli onu da qeyd edib ki, Azərbaycan ilə Rumıniya arasında imzalanmış sənədlərin ölkələrimizin əməkdaşlığının daha da inkişaf etdirilməsi üçün yaxşı əsas olduğunu bildirən dövlətimizin başçısı Heydər Əliyev bir sıra beynəlxalq təşkilatlarda dövlətlərimizin əlaqələrinin hazırkı vəziyyətindən həmişə razılıqla bəhs etmişdir. Baş redaktor həmin dövrlərdə dövlətimizin başçısı ilə görüşündən və onunla tanış olmaqdan məmnun qaldığını bildirən cənab Konstantineskunun Prezident Heydər Əliyevin Rumıniyaya səfərini ölkələrimiz arasında əlaqələrin inkişaf etdirilməsində mühüm mərhələ kimi qiymətləndirdiyini, o vaxt cənab Emil Konstantineskunun Azərbaycan-Rumıniya əməkdaşlığının möhkəmləndirilməsi naminə imzalanmış sənədlərin ölkələrimiz arasında münasibətlərin daha da möhkəmlənməsi üçün yaxşı əsas yaratdığını nəzərə çarpdırdığını xatırladıb.

Daha sonra iqtisadiyyat, ticarət, mədəniyyət, təhsil və bir sıra digər sahələrdəki əməkdaşlıq imkanlarından söhbət açan Emil Nəsirli Rumıniya-Azərbaycan əlaqələrinin möhkəmləndirilməsinin hər iki dövlət üçün xüsusi əhəmiyyətini vurğuladı. Baş redaktor bildirdi ki, Azərbaycan Prezidenti Cənab İlham Əliyevin həyata keçirdiyi siyasət nəticəsində ölkəmizlə dünya dövlətləri arasında münasibətlər daha da sıxlaşır, iqtisadi, mədəni, siyasi münasibətlər müstəvisində uğurlar əldə olunur. Dünyanın bir çox ölkələri ilə yanaşı, Azərbaycanla Rumıniya arasında əlaqələr də yüksələn bir xətlə inkişafdadır.

Görüşdə Rumıniyanın sabiq Prezidenti Emil Konstantinesku "Azərbaycanım" beynəlxalq jurnalının beynəlxalq əlaqələrinin genişləndirilməsi istiqamətində atılan addımları yüksək qiymətləndirib, ötən ilin may ayından "Azərbaycanım" beynəlxalq jurnalının fəxri üzvü olmağından və eləcə də həmin ildə jurnalın təsis etdiyi "Azərbaycanın Dostu” qızıl ordeninə layiq görüldüyündən məmnunluğunu bir daha ifadə edib.

Rumıniyanın sabiq Prezidenti Emil Konstantinesku "Azərbaycanım" beynəlxalq jurnalının Redaksiya Şurasına və kollektivinə gələcək fəaliyyətində uğurlar arzulayıb, iki ölkə arasında əlaqələrin və əməkdaşlığın gücləndirilməsi istiqamətində Azərbaycan tərəfinin gördüyü işləri yüksək qiymətləndirib.

Sonra Rumıniyanın sabiq Prezidenti Emil Konstantinesku redaksiyanın baş ofisində "Azərbaycanım" beynəlxalq jurnalının ötən illər ərzində fəaliyyətini özündə əks etdirən foto stendlə tanış olub, daha sonra ənənəvi olaraq "Azərbaycanım" beynəlxalq jurnalının redaksiyasının 2024-cü ildə qonağı kimi jurnalın "Fəxri Xatirə kitabı”na ürək sözlərini yazıb.

Görüşdə Rumıniyanın sabiq Prezidenti Emil Konstantinesku "Azərbaycanım" beynəlxalq jurnalının kollektivi ilə birgə foto çəkdirib.