Azərbaycan Respublikasının Prezidenti cənab İlham Əliyevin Qazaxıstanın paytaxtı Astana şəhərində “ŞƏT plyus” formatında keçirilmiş görüşdə iştirakı ölkəmizin Şanxay Əməkdaşlıq Təşkilatına üzv dövlətlərlə münasibətləri və qarşılıqlı əlaqələrin inkişafı baxımından olduqca önəmlidir. Qeyd edək ki, Azərbaycan ŞƏT-in Zirvə toplantısına ikinci dəfədir dəvət olunur. Bu fakt Azərbaycan ilə üzv dövlətlər arasında inkişaf edən tərəfdaşlığın göstəricisi kimi mühüm əhəmiyyət kəsb edir. Onu da qeyd etmək lazımdır ki, cənab Prezident Zirvə toplantısı çərçivəsində Rusiya, Qazaxıstan, Türkiyə prezidentləri, Çin sədri və Pakistanın Baş naziri ilə səmərəli və olduqca məhsuldar görüşlər keçirib. Xüsusilə qeyd etmək lazımdır ki, Astana Zirvə görüşü çərçivəsində “Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə”nin imzalanması  iki ölkə arasında münasibətlərin daha da inkişafı, eləcə də, siyasi, iqtisadi və mədəni sahələrdə əməkdaşlığın daha da genişləndirilməsi baxımından mühüm əhəmiyyət kəsb edir. Bütün bunlar qeyd olunan ölkələrin Azərbaycanla əməkdaşlıqdan məmnun olduqlarını, həmçinin, ölkələrimiz arasında mövcud olan əlaqələrin daha da inkişaf etdirilməsində maraqlı olduqlarının əyani təzahürüdür.
Bu fikirləri saytımıza açıqlamasında VI çağırış Milli Məclisin deputatı Tamam Cəfərova deyib.
O bildirib ki, Şərq-Qərb və Şimal-Cənub nəqliyyat dəhlizləri üzrə qarşılıqlı fəaliyyət Azərbaycan ilə ŞƏT-ə üzv dövlətlər arasında əməkdaşlığın vacib sahəsini təşkil edir. Həmçinin, Azərbaycan bu təşkilata bütün dünyada sabitliyin bərqərar olması işinə fəal töhfə verən bir mexanizm kimi baxır. Rəsmi Bakı ŞƏT-ə ümumi əməkdaşlıq platforması kimi baxmaqla yanaşı, üzv dövlətlərlə uğurlu ikitərəfli münasibətləri inkişaf etdirməyi xarici siyasətinin prioritetlərindən biri kimi müəyyənləşdirmişdir. Əlbəttə, Azərbaycan və ŞƏT arasında bu münasibətlər qarşılıqlıdır. Şanxay Əməkdaşlıq Təşkilatı da ölkəmizi özünün fəal tərəfdaşlarından biri kimi qəbul edir. Eyni zamanda, təşkilat  Azərbaycanla əməkdaşlığın hər tərəfli inkişafının vacibliyini vurğulayıb.
Bütün bunları nəzərə alaraq, qeyd etməliyik ki, Prezident İlham Əliyevin rəhbərliyi altında dövlətin həyata keçirdiyi uğurlu xarici siyasət sayəsində beynəlxalq münasibətlər sistemində çətin və mürəkkəb proseslərin getdiyi bir vaxtda ölkəmizin öz mövqeyini gücləndirməsi, həmçinin, geopolitik mərkəzə çevrilməsi Azərbaycanın qlobal siyasi güc olaraq nüfuzunu hər gün daha çox artırır. Bütün bu məqamlar ŞƏT başda olmaqla dünyanın bir çox aparıcı beynəlxalq təşkilatları  ilə Azərbaycan arasında əməkdaşlıqda müsbət sinerji yaradır.