Azərbaycan Milli Məclisinin sabiq deputatı, Beynəxalq hüquq sahəsində fəlsəfə doktoru, Azərbaycan Yazıçılar Biliyinin üzvü, Əfşarlar soyundan olan Cahangir Hüseyn Əfşar Məsud Pezeşkianı İran İslam Respublikasının prezidenti seçilməsi münasibətilə təbrik edib.

Newscenter.az-ın xəbərinə görə, təbrik məktubunda seçkilərdə inamlı qələbə qazanaraq İran İslam Respublıkasının prezidenti seçilməsi münasibəti ilə Məsud Pezeşkianı səmimi qəlbdən təbrik edən sabiq millət vəkili bu Ali vəzifənin icrasında Ona uğurlar arzulayıb:

"Cənab Prezident, Seçkilərdə qazandığınız böyük qələbə islahatçı namizəd kimi İran İslam Respublikasının demokratikləşməsinə, ali İslam qanunları ilə hüquqi dövlətin formalaşmasına, geniş islahatların aparılmasına imkan yaradacaq. İnanıram ki, tezliklə İran İslam Respublikası da dünya birliyinin bərabər hüquqlu bir üzvünə çeviriləcəkdir.
İranın qədim, böyük möhtəşəm tarixi, ərazisində qurulan dövlətlər və imperiyaların əzəməti bir daha yenidən İran İslam Respublikasının timsalında parlayacaqdır.

Ölkə prezidenti kimi fəaliyyətiniz dövründə atacağınız addımlar, həyata keçirəcəyiniz islahatlar nəticəsində İran ərazisində yaşayan bütün xalqların millətindən, dinindən, dilindən və əqidəsindən aslı olmayaraq vətəndaş hüquqlarının bərqərər olacağına əminlik yaranacaq, İranda yaşayan bütün millətlərə öz ana dillərində tədris almaq hüququ veriləcək, qadın vətəndaşlarının hüquqları bərqərar olunacaq və ölüm hökümləri İran qanunvericiliyindən çıxarılacaq.

Azərbaycan Respublikasında yaşayan vətəndaşlarımızın cənubda yaşayan soydaşları ilə mədəni, siyasi və s. sahələrdə əlaqələri daha da genişləndiriləcəkdir".

Cahangir Hüseyn Əfşar əmin olduğunu bildirib ki, Məsud Pezeşkianın İran İslam Respublikasına rəhbərliyi dövründə çoxəsrlik tarixə malik olan Azərbaycan Respublikası ilə İran İslam Respublikasının əlaqələri daha da inkişaf edəcək, iki dost-qardaş ölkə arasında əməkdaşlıq həyatımızın müxtəlif sahələrində daha da irəli gedərək yeni bir mərhələyə qədəm qoyacaq:

"İki ölkə arasında münasibətlərin inkişafı təkcə region da deyil, eyni zamanda dünya üçün vacib əhəmiyyət daşıyan nəqliyyat dəhlizlərinin genişlənməsinə, logistik imkanların artmasına imkan yaradacaq.

Cənab Prezident Pezeşkian,

Fürsətdən istifadə edib Qarabağ zəfərimizə həsr etdiyim "Yeni Qarabağnamə-Qarabağ Azərbaycandır!" kitabımı Sizə təqdim edirəm. Məlumat üçün qeyd edim ki, kitab Azərbaycan Respublikasının Prezidenti, Ali Baş Komandan İlham Əliyevin rəhbərliyi altında Müzəffər Azərbaycan Ordusunun 30 ildən artıq işğal altında olan ərazilərimizin azad edilməsinə, eyni zamanda Qarabağın tarixi Azərbaycan əraziləri olmasını özündə əks etdirən faktlara həsr olunub. Kitab türk və ingilis dillərinə tərcümə olaraq bir sıra ölkələrdə yayımlanmaqdadır.

Cənab Prezident,

Bir daha Sizi İran İslam Respublikasının Prezidenti seçilməyiniz münasibətilə səmimi qəlbdən təbrik edir, can sağlığı və İran İslam Respublikasının tərəqqisi naminə müvəffəqiyyət, həmçinin, İranda yaşayan 80 miliyondan artıq insanın hər birinə xoşbəxtlik və rifah arzulayıram".

Qeyd edək ki, saniq millət vəkili müəllifi olduğu "Yeni Qarabağnamə-Qarabağ Azərbaycandır!" kitabını da İran prezidentinə hədiyyə olaraq göndərib.