"Vətən müharibəsində ölkəmizin qələbəsindən iki il ötməsinə baxmayaraq bölgədə hələ də sabitlik tam olaraq bərqərar olmayıb. Daha dəqiq desək cənubi Qafqaza sabitliyin gəlməsinə maraqlı olmayan dairələr yenə də öz çirkin planlarını həyata keçirmək üçün əsirlərdir maşa kimi istifadə etdikləri ermənilərə yeni xüsusi tapşırıqlar verərək onların əli ilə bölgədə təxribatlar törətməyə başlayıblar". Bu fikri Milli Məclisin İqtisadi Siyasət, sənaye və sahibkarlıq komitəsinin sədri Tahir Mirkişili "Xeber 7”ə bildirib.

Tahir Mirkişili deyib ki, son günlər bölgədə təxribatların sayı daha da artıb: "Buna səbəb isə ölkəmizin Avropa İttifaqı ilə imzaladığı müqavilə və aparılan digər uğurlu siyasətə qarşı barışmaz mövqe nümayiş etdirmələri və ölkəmizin uğurlarına qısqanclıqla yanaşmadır. Azərbaycan faktiki olaraq regionun lider dövləti olduğunu sübut etmiş və regionda iqtisadi layihələrə rəhbərlik edən bir ölkədir. Əlbəttə ki, bütün bu kimi uğurlarımız bizə düşmən olan xarici dairələrin ürəyincə olan bir proses deyil. Ona görə də bölgədə hərbi terrorçu dəstələrə malik olan ermənilərdən maşa olaraq istifadə edirlər. Əslində isə bölgədə yerləşdirilən sülhməramlılar bu cür təxribatlara mane olmalı və terrorçu dəstələrin bölgədən çıxarılmasını təmin etməlidir. Ancaq görünən odur ki, həmin sülhməramlılar ya bu terrorçu dəstələrdən çəkinirlər, ya da onalrın bu cür təxribatçı fəaliyyəti orada yerləşdirilən sülhməramlıların ürəyincədir. Məhz onların yarıtmaz fəaliyyətinin nəticəsidir ki, bu günlərdə Müzəffər Azərbaycan Ordusunun igid əsgəri bölgədə qeyri-qanuni yerləşdirilmiş erməni hərbi terrorçu dəstələrinin təxribatları nəticəsində şəhid olmuşdur. Buna cavab olaraq isə Azərbaycan öz konstitusiyon və beynəlxalq hüquqa dayanaraq və bağlanmış üçtərəfli müqavilənin müvafiq maddələrinə əsaslanaraq  öz ölkəsi ərazisində anti-terror əməliyyatları keçirmək hüququndan istifadə edir. Buna görə də Azərbaycana heç bir xarici ölkə təsir edə bilməz. Çünki ordumuz hansısa dövlətin ərazisində deyil, öz sərhədləri çərçivəsində anti-terror əməliyyatı həyata keçirir. Artıq yeni bir Azərbaycan var! Bunu anlamayanlar öz başlarında daim Dəmir Yumruğu görəcəklər!”