Azərbaycan Prezidentinin sədrliyi ilə keçirilən müşavirə 2024-cü ildə Azərbaycan iqtisadiyyatının dayanıqlı artım tempini qoruyub saxladığını ortaya qoydu.  Ölkədə aparılan ciddi sosial-iqtisadi islahatlar iqtisadi inkişaf tempinə müsbət təsir göstərib. Mövcud iqtisadi və sosial mühit beynəlxalq təşkilatlar tərəfindən yüksək qiymətləndirilir. “Doing Bussines”in hazırladığı iqtisadi reytinq cədvəlində də Azərbaycan dünyada ən çox islahat aparan  ölkələrdən biri kimi qeyd olunmuşdur. İqtisadiyyatın sürətli inkişafı üçün kifayət qədər zəmin mövcuddur. Bunun nəticəsidir ki, ilin əvvəlindən iqtisadi inkişaf gözlənilən səviyyədədir. Bu ilin 8 ayında iqtisadi artım 4,3 faiz təşkil edib. Qeyri-neft sektorunda artım isə 7 faiz təşkil edib ki, bu da dünyada gedən proseslər, gərgin regional geosiyasi vəziyyət, xarici şirkətlərin ölkədə neft hasilatını azaltması fonunda yaxşı göstəricilərdir. Ölkə iqtisadiyyatının şaxələndirilməsi istiqamətində atılmış addımlar və düşünülmüş islahatlar öz müsbət nəticəsini verməkdədir.

Bu fikirləri Milli Məclisin deputatı Tahir Mirkişili sentyabrın 26-da Prezident İlham Əliyevin yanında keçirilmiş iqtisadi müşavirə ilə bağlı bildirib. 

Onun sözlərinə görə, aparılan iqtisadi islahat və yaranmış biznes mühiti iqtisadiyatımızın digər sektorlarının inkişafına müsbət təsir göstərir. Biz iqtisadi ehtiyatlardan səmərəli istifadə etməklə həm ümumi daxili məhsulda, həm qeyri-neft sektorunun inkişafında yaxşı nəticələr əldə edə bilərik. Sözsüz ki, iqtisadiyyatımızda neft sektorundan əldə edilən gəlirlərin payı böyükdür. Təəssüf ki, ölkəmizdə fəaliyyət göstərən bəzi xarici şirkətlər neft hasilatını sabit saxlamaqda maraqlı deyillər. Prezident İlham Əliyev çıxışında qeyd etdi ki, neft hasilatında buraxılmış nöqsanlar xarici neft şirkətlərinin diqqətinə çatdırılıb və onlardan bu nöqsanlar aradan qaldırmaq tələb olunub. Söhbət neft hasilatının sabitliyi təmin edilməsindən gedir. Bundan sonra neft hasilatında əsassız azalmanın olmayacağına ümidlər var.

Deputat qeyd edib ki, hədəfimiz iqtisadiyyatımızı daha da şaxələndirmək və dayanıqlı inkişaf modelini təkmilləşdirməkdir. Azərbaycanın dövlət büdcəsi sosialyönümlüdür. Gələn il minimum əməkhaqqı və minimum pensiya artırılacaq. Hərbi sənaye kompleksinin inkişafı, Qarabağın və Şərqi Zəngəzurun bərpası fonunda sosial təminat məsələlərinə kifayət qədər böyük vəsaitin ayrılması iqtisadiyyatımızın potensialından xəbər verir. Əldə etdiyimiz qələbənin möhkəmləndirilməsi, təhlükəsizliyimizin gücləndirilməsi, iqtisadi inkişafın sürətləndirilməsi, sosial qayğının artırılması üçün dövlət başçısının aydın və güclü siyasi iradəsi vardır.  Digər vacib istiqamət separatizmin kökünü kəsmiş, ərazi bütövlüyünü tam təmin ölkəmizə xarici investorların marağının artmasıdır. Hərbi əməliyyatda əldə etdiyimiz uğurlar ölkəmizdə sabitlirin tam təmin olunmasına gətirib çıxarıb ki, bu da bizim iqtisadi nüfuzumuza müsbət təsir göstərib. İndi biz işğaldan azad edilmiş torpaqlarda da yeni sənaye parkları yaradırıq. Heç bir yerdən yardım almadan, əskinə xarici borcumuzu azaldaraq həyata keçirdiyimiz sosial-iqtisadi layihələr ölçüyəgəlməzdir. Xarici borcun ümumi daxili məhsuldakı payı cəmi 7,5 faizdir ki, bu da dünya miqyasında qabaqcıl ölkələrdən olduğumuza dəlalət edir. 2025-ci ilin əsas xərcləri artıq müəyyən edilib. Ölkəmizin hərbi potensialı gücləndiriləcək, təhlükəsizlik tam təmin olunacaq, hərbi sənaye kompleksi inkişaf etdiriləcək. Qarabağın və Şərqi Zəngəzurun bərpası ilə bağlı layihələr davam etdiriləcək. Bütün bu layihələr Dövlət İnvestisiya Proqramında öz əksini tapacaq. Onu da bildirim ki, 2020-ci ildən sonra işğaldan azad edilmiş ərazilərdə bərpa-quruculuq işlərinin həyata keçirilməsi dövlət büdcəsindən 17,5 milyard manata yaxın xərclənib. Gələn il isə bu məqsədlər üçün daha 4 milyard manat vəsait ayrılması nəzərdə tutulur. Qarabağın bərpası və yenidən qurulması prosesləri Azərbaycanın ərazi bütövlüyünün möhkəmləndirilməsi ilə yanaşı, bölgənin sosial-iqtisadi inkişafına da müsbət təsir göstərəcək.

T.Mirkişili vurğulayıb ki, 2024-cü ilin yekunları, növbəti illər üçün daha nikbin proqnozlar səsləndirməyə imkan verir. 2025-ci ilin büdcəsi müzakirə olunur. Büdcə layihəsi göstərir ki, gələn il də iqtisadi inkişaf tempi qorunub saxlanılmaqla yanaşı, ciddi inkişaf da müşahidə olunacaqdır. Gələn il qeyri-neft sektorunda artımın ümumi iqtisadi artımdan iki dəfəyə qədər çox olması proqnozlaşdırırlır. Bu da bizim əsas hədəfimizə çox yaxınlaşmağımızdan xəbər verir.

Deputat sonda bildirib ki, Prezident İlham Əliyev nitqində Azərbaycanın qarşısında dayanan strateji hədəfləri dəqiq müəyyən edib. Biz bunu dövlətimizin başçısının yanında keçirilən sonuncu iqtisadi müşavirdə səsləndirilən fikirlərdən də gördük. Cənab İlham Əliyevin rəhbərliyi ilə həyata keçirilən daxili və xarici siyasət dövlətin iqtisadi gücünün daha da artırılmasına, regionda sabitliyin və təhlükəsizliyin qorunmasına xidmət edir.