Qazaxıstan-Azərbaycan münasibətləri Mərkəzi Asiya və Cənubi Qafqaz regionlarında iqtisadi-siyasi baxımdan təyinedici münasibətlərdir. Hər iki ölkənin iqtisadi və kommunikasiya ehtiyatları böyük potensiala sahib olmaqla tarixi İpək yolunun orta xətti üzrə əsas vektoru təşkil edir. İstər tarixi kontekstdə, istərsə də son 30 illik müstəqillik dövründə Qazaxıstan və Azərbaycan etibarlı tərəfdaş, yaxın dost və qardaş ölkələr olublar.

Bunu AZƏRTAC-a açıqlamasında Milli Məclisin deputatı Hikmət Babaoğlu söyləyib.Onun sözlərinə görə, ən yaxın siyasi keçmişimizin çətin dövrlərində, artıq tarixə qovuşmuş münaqişə dövründə qardaş ölkə istər siyasi-diplomatik, istərsə də mənəvi-siyasi baxımdan həmişə Azərbaycanın yanında olub.

"Tarixi Zəfərimizdən sonra da Qazaxıstan bu uğurlarımızı öz uğuru kimi qəbul edən ölkələrdən biri kimi çıxış edib. Hazırda işğaldan azad edilmiş ərazilərimizin yenidən qurulması prosesində iştirak etmək istəyən, həmin torpaqlara sərmayə yatırmaq üçün müraciət edən şirkət və özəl sektor nümayəndələri içərisində Qazaxıstan təmsilçiləri birinci yerdədir”, - deyə H.Babaoğlu diqqətə çatdırıb.Deputat vurğulayıb ki, qardaş ölkənin Prezidenti Kasım-Jomart Tokayevin Azərbaycana səfəri rəsmi tərəfi ilə yanaşı, mənəvi-siyasi tərəfi ilə də yaddaqalan oldu. Azərbaycan Prezidenti İlham Əliyevin Qazaxıstan dövlətinin ən ali mükafatı – “Altın kıran” – “Qızıl qartal” ordeni ilə təltif edilməsi yuxarıda dediklərimizin əyani sübutudur.Qazaxıstan tərəfindən Füzuli rayonunda tikiləcək Kurmanqazı adına Yaradıcılığın İnkişafı Mərkəzinin layihəsinin təqdim edilməsi də dediyimiz mənəvi-siyasi münasibətlərin əsas göstəricilərindən biri hesab edilə bilər. Çünki Qarabağ Azərbaycanın musiqi beşiyi, mədəniyyət mərkəzlərindən biridir. Kurmanqazı Saqırbayulu da XIX əsrin əvvəllərində yaşamış böyük qazax musiqiçisi və bəstəkarıdır.Şuşa və Türküstan şəhərlərinin qardaşlaşmasının isə digər xüsusi hadisə olduğunu bildirən Hikmət Babaoğlu deyib: “Çünki Türküstan Əl Fərabi ət Türkün, Əhməd Yasəvinin, Şuşa İsə Əhməd bəy Ağaoğlunun, Üzeyir Hacıbəylinin vətənidir. Göründüyü kimi, bütün bunlar xüsusi diqqət və uzaqgörən hədəflərə hesablanaraq atılan, tarixi ortaq köklərimizə hesablanan qərarlardır. Müasir beynəlxalq münasibətlər sisteminin reallıqlarına gəldikdə, Azərbaycanla Qazaxıstan arasında imzalanan “Azərbaycan Respublikası ilə Qazaxıstan Respublikası arasında strateji münasibətlərin möhkəmləndirilməsi və müttəfiqlik qarşılıqlı fəaliyyətinin dərinləşdirilməsi haqqında Bəyannamə” iki qardaş ölkənin gələcək təhlükəsizliyi və əməkdaşlığının perspektivləri baxımından mühüm əhəmiyyət kəsb edən strateji sənəddir. Bu, iki qardaş ölkənin münasibətləri tarixində tamamilə yeni bir mərhələ yaratmaqla daha dərin inkişaf və inteqrasiyaya gətirib çıxaracaq”.