Azərbaycanın Özbəkistandakı səfirliyinin nəzdində Heydər Əliyev adına Azərbaycan Mədəniyyət Mərkəzinin layihəsi ilə Daşkənd İqtisadiyyat və Pedaqoji Universitetində görkəmli türkoloq, özbək əsilli Azərbaycan alimi Xalid Səid Xocayevə həsr olunmuş, özbək dilinə tərcümə edilərək nəşr olunmuş “Xolid Said Xo‘jayev” kitabının təqdimat mərasimi keçiriləcək, eyni zamanda onun adını daşıyan Azərbaycanşünaslıq auditoriyasının açılışı baş tutacaq.

Azər Turonun müəllifi olduğu “Xolid Said Xo‘jayev” kitabı 1937-ci il repressiyasının qurbanlarından biri, görkəmli türkoloq, “Divanü lüğat-it-türk” əsərinin Azərbaycan dilinə ilk tərcüməçisi olan azərbaycanlı alim Xalid Səid Xocayevin həyat və elmi fəaliyyətinə həsr olunub. Nəşr alimin zəngin irsini işıqlandırmaqla yanaşı, müasir türkşünaslıq tarixinin bir sıra mühüm məqamlarına aydınlıq gətirir.

Tədbirdə Azərbaycan və Özbəkistanın rəsmi şəxsləri, elm və təhsil ictimaiyyətinin təmsilçiləri iştirak edəcəklər.

Layihə çərçivəsində yaradılacaq auditoriya Azərbaycan ədəbiyyatı, tarixi və mədəniyyətini əks etdirən zəngin kitab fondu, foto materiallar və müxtəlif tədris vəsaitləri ilə yanaşı, görkəmli alim Xalid Səid Xocayevin həyat və elmi irsini əks etdirən nəşrlər, arxiv materialları, foto-sənədlər və digər təqdimat materialları ilə də təmin olunacaq.

Auditoriyanın tərtibatında Azərbaycan və Özbəkistanın dövlət bayraqları, görkəmli şəxsiyyətlərin portretləri, Azərbaycanın xəritəsi və digər vizual elementlər yer alacaq.

Yeni yaradılan auditoriya tələbələrin Azərbaycan dili, ədəbiyyatı və mədəniyyəti ilə daha yaxından tanış olması, eləcə də elmi müzakirələrin, təqdimatların və birgə layihələrin həyata keçirilməsi üçün mühüm akademik platforma rolunu oynayacaq.

Bu təşəbbüs Azərbaycan ilə Özbəkistan arasında elmi-mədəni əlaqələrin daha da möhkəmləndirilməsinə, ortaq türk irsinin öyrənilməsi və təbliğinə xidmət edir.