Atıcılıq idman növü olmaqla yanaşı, həm də aktiv istirahət növüdür. Bakı Atıcılıq Mərkəzində bu istirahət hər kəs üçün – yerli vətəndaşlara və xarici turistlərə açıqdır.

“Mərkəzdə yaradılmış şərait buranın beynəlxalq yarışların keçirildiyi yer olmaqla yanaşı, korporativ və ailəvi istirahət məkanı kimi tanınmasına imkan verir. Məlumatlılığın artması, insanların aktiv istirahətə üstünlük verməsi səbəbindən, getdikcə daha çox vətəndaşımız bizim Mərkəzə üz tutur. Xüsusilə, bayramlar, istirahət günlərində daha çox adam olur”, - Bakı Atıcılıq Mərkəzinin direktoru Tamerlan Hacıyev belə deyib. Tamerlan Hacıyev qeyd edib ki, tur şirkətləri turistlər, müxtəlif qurumlar korporativ istirahət, ailələr isə ailəvi asudə vaxtın təşkili üçün Mərkəzin xidmətindən faydalanırlar.

“Bakı Atıcılıq Mərkəzində asudə vaxtını keçirmək istəyənlərin sayının artması bizi çox sevindirir. Əminik ki, Mərkəzdə gördükləri şərait ailələri ilə buraya gələn uşaqların seçiminə, böyüklərin isə həm azarkeş kütləmizi artırmasına, həm də gənclərə tövsiyələrinə təsir göstərəcək” – Azərbaycan Atıcılıq Federasiyasının baş katibi Emin Cəfərov  bu fikirdədir.

Qeyd edək ki, Bakı Atıcılıq Mərkəzi 20 hektara yaxın ərazini əhatə edir.