“Keyfiyyət Assosiasiyası” İctimai Birliyi tərəfindən 20 fevral 2025-cil tarixində Yeni Klinikada "ISO 7101:2023 Səhiyyə təşkilatının idarə edilməsi - Səhiyyə təşkilatlarında keyfiyyəti idarəetmə sistemləri - Tələblər” adlı beynəlxalq standartın Azərbaycan dilinə tərcüməsinin təqdimatı keçirilib.

Təqdimat mərasimi “Keyfiyyət Assosiasiyası” İctimai Birliyi və Özəl Tibb Müəssisələri Assosiasiyasının  təşkilatçılığı və "Tibbi Ərazi Bölmələrini İdarəetmə Birliyi"nin təşkilatı dəstəyi ilə baş tutub.

Açılış nitqində tədbirin keçirilməsinə göstərdiyi dəstəyə görə Keyfiyyət  Assosiasiyası tərəfindən tədbirin təşkilinə sponsorluğ edən BTL Azərbaycan, Arbitro Huquq şirkəti, Səhhət Azərbaycan Almaniya tibb klinikası, SEM Academy və Medic Schoola təşəkkür edilib.

Tədbirdə “Keyfiyyət Assosiasiyası” İctimai Birliyinin sədri Samir Novruzlu çıxış edərək  tədbirin keçirilmə məqsədini, adı keçən standartın azərbaycan dilində hazırlanma zərurətini, onun müəssisələrimiz və mütəxəssislər üçün nəzəri və praktiki vəsait kimi əhəmiyyətini qeyd edib. S. Novruzlu həmçinin bu vəsaitin nəşrinə maliyyə dəstəyi göstərən qurumlara Keyfiyyət Assosiasiyası adından öz təşəkkürünü bildirib.

Daha sonra çıxış üçün söz Tibbi Ərazi Bölmələrini İdarəetmə Birliyinin (TƏBİB) İcraçı direktorunun müavini Araz Nəsirova verilib. Direktor müavini son illər ölkədə səhiyyə sahəsində həyata keçirilən islahatlardan, səhiyyənin inkişafına dövlət tərəfindən göstərilən qayğı və diqqətindən danışıb.

Tədbirdə Milli Məclisin Səhiyyə komitəsinin sədr müavini, millət vəkili Rəşad Mahmudov çıxış edib. Millət vəkili çıxışı zamanı səhiyyənin inkişafı və problemləri ilə bağlı bir sıra vacib məsələlərə toxunub.

Millət vəkili çıxışında Keyfiyyət Assosiasiyası tərəfindən hazırlanmış ISO 7101 standartının səhiyyə və tibb müəssisələrinin fəaliyyətinin standartlaşdırılmasına qatacağı dəyəri və bu cür təşəbbüslərin gələcəkdə də davam etdirilməsini  eləcə də QHT təşkilatları arasında əməkdaşlığın vacibliyini vurğulayıb. O, eyni zamanda bu əməkdaşlığın nəticəsi olaraq mavafiq layihə və təkliflərin Milli Məclisə təqdim edilməsinin məqsədəuyğun olduğunu qeyd edib.

Tədbirdə TƏBİBİ nnümayəndələri Teymur Mirzəbəylinin, Fəqan Həsənzadənin və Azərbaycan Standartlaşdırma İnstitutunun direktor əvəzi Kəmalə Məmmədzadənin çıxışları maraqla dinlənilib.

Daha sonra Keyfiyyət Assosiasiyasının səhiyyə müəssisələrində beynəlxalq standartların tətbiqi üzrə məsləhətçi, auditor və təlimçisi Günay Paşanın təqdimatında ISO 7101 beynəlxalq standartı, onun strukturu, məqsədi, hədəf auditoriyası, faydaları haqqında məlumat verilib.

Təqdimat mərasimində Özəl Tibb Müəssisələri Assosiasiyası (ÖTMA) İdarə Heyətinin Sədri Günel Əliyeva, Yeni Klinikanın Direktorunun iqtisadi məsələlər üzrə müavini Ravil Tağıyev çıxış edərək keyfiyyəti  idarəetmənin aktual məsələlərinə,  keçirilən tədbirin səhiyyə və tibb müəssisələri  üçün əhəmiyyətinə toxunublar.

Tədbirdə ölkəmizdə ilk dəfə ISO 7101 beynəlxalq standartını tətbiq etmiş “Səhhət” Azərbaycan-Almaniya tibb klinikasına və Oki Hospitalına sertifikatlar təqdim edilib. Sertifikatlar INCERT sertifikatlaşdırma şirkətinin direktoru Şamo Muradov tərəfindən təqdim edilib. Ş. Muradov “Səhhət” klinikasında və Oki Hospitalında keçirilən audit və sertifikatlaşdırma prosesindən bəhs edib.

Bundan sonra söz “Səhhət” Azərbaycan - Almaniya klinikasının direktoru Malik Kərimova verilib. Direktor çıxışında rəhbərlik etdiyi klinikada ISO 7101 standartının tətbiqi və onun faydaları barədə iştirakçılara məlumat verib.

Təqdimat mərasimi maraqlı müzakirələr və iştirakçıların suallarının cavablandırılması ilə başa çatıb.