Bakı, Azərbaycan – 14 iyul 2025 – Azərbaycanın aparıcı özəl səhiyyə müəssisələrindən biri olan Məlhəm Beynəlxalq Hospital tibbi turizm sahəsində beynəlxalq əməkdaşlığın genişləndirilməsi məqsədilə nüfuzlu ekspertlərdən ibarət nümayəndə heyətini qəbul edib.

Zefer.media xəbər verir ki, tibbi turizm və səhiyyə idarəçiliyi üzrə ekspert Elnarə Musəyevanın rəhbərliyi və Azərbaycan Sağlamlıq və Termal Turizmə Dəstək Assosiasiyasının təşkilati dəstəyi ilə baş tutan rəsmi səfər çərçivəsində qonaqlar hospitalın strateji inkişaf planları, müasir infrastrukturu və beynəlxalq pasiyentlər üçün qurulmuş xidmət modeli ilə yaxından tanış olublar.

Müasir infrastruktur və çoxprofilli tibbi model

Səfər zamanı hospitalın İcraçı direktoru Sevda Əlizadə tərəfindən geniş təqdimat keçirilib. Qeyd olunub ki, 28 min kvadratmetr sahəni əhatə edən, 5 mərtəbəli müasir binada fəaliyyət göstərən Məlhəm Beynəlxalq Hospital 120-dən artıq yüksəkixtisaslı həkimdən ibarət peşəkar komanda ilə regionda çoxprofilli tibbi xidmət modelinin uğurlu nümunələrindən biridir.

Hospital aşağıdakı əsas istiqamətlər üzrə xidmət göstərir:

Kardiologiya və invaziv cərrahiyyə

Ümumi cərrahiyyə, urologiya, nevrologiya və neyrocərrahiyyə

Mama-ginekologiya və pediatriya

İxtisaslaşdırılmış İnsult Mərkəzi, Yuxu Mərkəzi və plastik cərrahiyyə

Beynəlxalq standartlara uyğun yüksək dəqiqlikli diaqnostika və laborator xidmətlər

Müəssisənin güclü texniki bazası və klinik imkanları sayəsində illik orta hesabla 200 min pasiyentə xidmət göstərildiyi bildirilib.

Beynəlxalq pasiyentlər üçün inteqrasiya olunmuş sistem

Təqdimat çərçivəsində hospitalın beynəlxalq pasiyentlər üçün formalaşdırdığı koordinasiya modeli xüsusi vurğulanıb. Qonaqlara tibbi paket proqramlar, çoxdilli tərcümə xidməti, beynəlxalq sığorta şirkətləri ilə əməkdaşlıq mexanizmləri və pasiyentin qəbulundan ölkəni tərk etməsinə qədər bütün mərhələləri əhatə edən idarəetmə sistemi barədə ətraflı məlumat verilib.

Bu model beynəlxalq pasiyentlərin təhlükəsiz, şəffaf və strukturlaşdırılmış xidmət almasını təmin edir.

“Prioritetimiz keyfiyyət və etibarlı tərəfdaşlıqdır”

İcraçı direktor Sevda Əlizadə çıxışında bildirib:

“Məlhəm Beynəlxalq Hospital olaraq xəstə təhlükəsizliyi və klinik protokollara riayət edilməsi əsas prioritetimizdir. Müasir səhiyyə yalnız tibbi xidmətlə məhdudlaşmır. Beynəlxalq pasiyentlərin etimadını qazanmaq üçün biz standartlaşdırılmış xidmət modeli və güclü tərəfdaşlıq şəbəkəsi formalaşdırırıq. Bu səfər Azərbaycanın regionda tibbi turizm mərkəzi kimi mövqeyinin möhkəmləndirilməsinə töhfə verir.”

Regional əməkdaşlıq və gələcək perspektivlər

Səfər çərçivəsində nümayəndə heyəti klinik şöbələrdə olub, tibbi personal ilə görüşlər keçirib və xidmət proseslərini yerində müşahidə edib. İşgüzar müzakirələr zamanı regional pasiyent axınının artırılması, beynəlxalq qəbul mexanizmlərinin təkmilləşdirilməsi və gələcək ortaq layihələrin icrası perspektivləri ətrafında fikir mübadiləsi aparılıb.

Ekspertlər hospitalın müasir infrastrukturu, beynəlxalq təcrübəyə malik mütəxəssisləri və pasiyent mərkəzli yanaşmasının regionda tibbi turizmin inkişafı baxımından yüksək potensiala malik olduğunu qeyd ediblər.

Bu rəsmi səfər Məlhəm Beynəlxalq Hospitalın beynəlxalq əməkdaşlıq platformalarının genişləndirilməsi və xarici pasiyentlər üçün cəlbedici tibbi mərkəz kimi mövqeyinin gücləndirilməsi istiqamətində həyata keçirdiyi strateji fəaliyyətin davamıdır.