Mirzə Ələkbər Sabir Fondu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Sabir gözü ilə: media və reklamlarda Azərbaycan dilinin pozulmasına tənqidi baxış (monitorinq)” layihəsinin icrasına başlayıb.

Mirzə Ələkbər Sabir Fondunun prezidenti Sevda Tahirli saytımıza bildirib ki, layihənin məqsədi Azərbaycanda media subyektlərinin və reklamların dilindəki qüsurları aşkar etmək, təhlil etmək və onların dil standartlarına uyğunluğunu qiymətləndirməkdir: “Cəmiyyətin bir hissəsi mediada və reklamlarda dil pozuntularına həssas deyil. Bu da media qurumlarının və reklam agentliklərinin məsuliyyətsizliyinə səbəb olur. Həmçinin keyfiyyətsiz dil istifadəsinin normallaşmasına gətirib çıxarır.

Mövcud qüsurların bir qisminin əsas səbəbi əcnəbi dillərə meyillilik və xarici brendlərin reklam mətnlərinin hərfi tərcümədə təqdim olunmasıdır. M.Ə.Sabir isə həmişə sadə və anlaşıqlı dildən istifadə etməyə çağırırdı. Bu baxımdan  media və reklam sahəsində çalışanlar klassiklərimizdən yararlanmalıdırlar. Hər iki sahədə problemlərin həllində vətəndaş cəmiyyətinin də fəallığının artırılması üçün bu layihəni həyata keçirməyi məqəsədəuyğun hesab edirik. Çap və onlayn medianın və reklamların (Bakı şəhərində) monitorinqinə həsr olunan layihə dükan, ictimai-iaşə obyekt­ləri, idman, sağlamlıq, tədris mərkəzlərinin və s. adlarında, onlara aid lövhələrdə (reklam, məlumat, menyü və s.) fonetik, leksik, qrammatik norma pozuntuları, üslub və ifadə səhvlərini əhatə edəcək”.

3 ay müddətində həyata keçiriləcək layihə çərçivəsində media subyektində və reklamlarda dil pozuntularının monitorinqi olacaq, jurnalistlər üçün dəyirmi masalar keçiriləcək. Bu tədbirlərdə jurnalistlərə tövsiyələr veriləcək, praktiki iş rejimində yazılarda ədəbi dil normalarına əməl olunması qaydaları haqqında danışılacaq. Bununla yanaşı, KİV-də məqalə, video və radio müsahibələrlə də təbliğati və maarifləndirici çıxışlar ediləcək.