Xəbər verildiyi kimi, Mirzə Ələkbər Sabir Fondu 2025-ci ilin mayın 1-dən başlayaraq Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Sabir gözü ilə: media və reklamlarda Azərbaycan dilinin pozulmasına tənqidi baxış (monitorinq)” layihəsini icra edir.  Mustaqil.az-ın məlumatına görə, layihə çərçivəsində iyulun 9-da “Xalq cəbhəsi” qəzetinin redaksiyasında dəyirmi masa keçirilib. Tədbirdə AMEA Dilçilik İnstitutunun, Azərbaycan Mətbuat Şurasının əməkdaşları, eləcə də KİV və QHT nümayəndələri iştirak ediblər.

AMEA Dilçilik İnstitutunun Monitorinq və linqvistik təhlil şöbəsinin müdiri filologiya elmlər doktoru, professor Sevinc Əliyeva bildirib ki, kütləvi informasiya vasitələri həm Azərbaycan dilinin təbliğində, həm də cəmiyyətin məlumatlandırılmasında mü­hüm rol oynayır: “Bu gün Azərbaycan dilinin qorunması və inkişa­fında istedadlı jurnalistlərin xidmətləri danılmazdır. Onlar qələmə aldıqları hadisələrə bir tərəfdən obyektiv, qərəzsiz yanaşırlarsa, digər tərəfdən də hadisələri yeni forma və üsullarla çatdırırlar. Çox təəssüf ki, bəzən mətbuatda ədəbi dil normalarından sapma halla­rı da müşahidə olunur”.

Layihə üzrə ekspert, jurnalist Fuad Hüseynzadə tədbirin reklam istehsalçılarına və KİV nümayəndələrinə çağırış xarakterli olduğunu bildirib: “Azərbaycan ədəbi dilinin düzgün istifadəsi milli kimliyimizin qorunması və cəmiyyətin mədəni inkişafı üçün vacibdir. Media və reklam sektorlarında dil normalarının pozulması həm ədəbi dilin keyfiyyətinə zərər vurur, həm də cəmiyyətin dildəki doğru təsəvvürünü təhrif edir. Bu vəziyyət monitorinqin zəruriliyini artırır. Buna görə də “Sabir gözü ilə: media və reklamlarda Azərbaycan dilinin pozulmasına tənqidi baxış (monitorinq)” layihəsi icra olunur. Layihənin hədəfi reklamlarda və mediada istifadə olunan mətnlərin keyfiyyətini qiymətləndirmək, mövcud qüsurları aşkar etmək və onların aradan qaldırılması üçün tövsiyələr hazırlamaqdır. Azərbaycanda açıq məkanlardakı reklamlarda və mediada ədəbi dilin qrammatik və leksik normalarında yol verilən qüsurların aşkarlanması ilə dilimizin təmizliyi yönündə iş daha da sürətləncək”.

Mətbuat Şurasının İdarə Heyətinin üzvü Bəhruz Məmmədzadə bildirib ki, media və reklam sahələrinin dili formalaşdırmaq və qorumaq kimi məsuliyyəti də var: “Dil yalnız ünsiyyət vasitəsi deyil, həm də milli kimliyin daşıyıcısıdır. Dil normalarına əməl etmək – milli mədəniyyətə hörmət əlamətidir. Jurnalistika və reklam ixtisaslarında dil mədəniyyəti fənlərinin tədrisinə xüsusi diqqət yetirilməlidir”.

“Xalq cəbhəsi” qəzetinin baş redaktoru Əli Zülfüqaroğlu mediada ədəbi dil normalarına riayət olunmaması ilə bağlı narahatlığını ifadə edib. O, mediada ədəbi dillə bağlı qüsurlara yol verən subyektlərə qarşı daha ciddi tədbirlərin görülməsini zəruri hesab edib: “Ədəbi dilin qorunması ümummilli məsələdir və bu istiqamətdə xüsusilə KİV nümayəndələri üzərlərinə düşən məsuliyyəti dərk etməli, aktiv şəkildə bu prosesə qoşulmalıdırlar. Biz “Xalq cəbhəsi” qəzeti olaraq bu layihəni təqdirəlayiq hesab edir və uğurlar arzulayırıq”.

Dəyirmi masada dilçi mütəxəssis və ekspertlər jurnalistlərə ədəbi dil normalarının qorunması və düzgün tətbiqi ilə bağlı müvafiq tövsiyə və təkliflər veriblər.