23 avqust 2025-ci il, Naxçıvan – Azərbaycan xalqının qəhrəman övladlarının müqəddəs xatirəsini əziz tutmaq və onların ailələrinə göstərilən diqqət və qayğını daha da gücləndirmək məqsədilə Naxçıvanda möhtəşəm tədbir keçirildi.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, “Xüsusi Təyinatlıların Qaziləri, Şəhid Ailələri və Veteranları” İctimai Birliyinin təşkilatçılığı və Cahan Holdinqin sosial məsuliyyət təşəbbüsü çərçivəsində şəhid və qazi ailələri üçün xüsusi ziyafət təşkil olundu.
Tədbir çərçivəsində “XTQ veteranları, şəhid ailələri ilə işin gücləndirilməsi” adlı forum da keçirildi. Forumda Azərbaycan və Türkiyədən olan qazi və şəhid ailələri bir araya gələrək həmrəylik nümayiş etdirdilər, qarşılıqlı təcrübə mübadiləsi apardılar və gələcək əməkdaşlıq perspektivlərini müzakirə etdilər.
Çıxış edən natiqlər dövlət dəstəyi, ictimai birliklərin fəaliyyəti və biznes qurumlarının sosial məsuliyyət təşəbbüslərinin vəhdətinin əhəmiyyətini vurğulayaraq bildirdilər ki, bu əməkdaşlıq şəhid ailələri və qazilər üçün daha geniş miqyaslı dəstək mexanizmlərinin formalaşmasına xidmət edir. Tədbir həm Azərbaycan–Türkiyə qardaşlığının sarsılmaz birliyinin təzahürü, həm də Vətən uğrunda canını fəda edənlərin ailələrinə ehtiramın bariz nümunəsi kimi dəyərləndirildi.
XTQ Qaziləri, Şəhid Ailələri və Veteranları İB sədri Bəhruz Məmmədzadə çıxış edərək bildirib ki, “Bu forum dövlətimizin dəstəyi ilə birliyimizin səsini dünyaya çatdırmaq, şəhidlərimizin müqəddəs xatirəsini yaşatmaq və qazilərimizin daim yanımızda olduğunu göstərmək baxımından mühüm əhəmiyyət daşıyır. Əminik ki, bu kimi tədbirlər gələcəkdə daha güclü həmrəylik və sosial dəstək mexanizmlərinin qurulmasına yol açacaq.”
“Cahan Holdinq” KŞİ-də aparat rəhbəri Azər Cəfərov çıxış edərək holdinqin prezidenti Vüqar Abbasovun salamını çatdırıb. O bildirib ki, “Cahan Holdinq olaraq sosial məsuliyyət fəaliyyətlərimizi hər zaman prioritet hesab edirik. Şəhid və qazi ailələrinin yanında olmaq, onların problemlərinə diqqət göstərmək bizim üçün mənəvi borcdur. Bu tədbir yalnız bir ziyafət deyil, həm də hörmət, ehtiram və həmrəyliyin təcəssümüdür. Gələcəkdə də bu istiqamətdə layihələrimizi davam etdirəcəyik.”
Türkiyə Respublikasının Naxçıvandakı Baş konsulu Asip Kaya çıxış edərək bildirib ki, “Türkiyə və Azərbaycan arasındakı qardaşlıq xüsusən də şəhid ailələri və qazilərimizin birliyi üzərində daha da möhkəmlənir. Bu forum qardaş ölkələrimiz arasındakı sarsılmaz bağların bariz nümunəsidir.”
Qars Şəhid və Qazilər Dərnəyinin başqanı Muhsin Ağçay çıxış edərək bildirib ki, “Azərbaycan və Türkiyə şəhidlərinin qanı bu torpaqlarda qardaşlığımızı əbədi olaraq möhürləyib. Bu birlik gələcək nəsillərə miras qoyacağımız ən böyük dəyərdir.”
Naxçıvan Şəhid Ailələri İB sədri, şəhid atası Mais Gülməmmədov çıxış edərək bildirib ki, “Şəhid ailələrinin yanında olmaq, onların dərdlərini bölüşmək hər birimizin mənəvi borcudur. Biz bu birliyi yaşatdıqca övladlarımızın xatirəsi də daim yaşayacaq.”
İnkişafa və İslahatlara Dəstək İB sədri Ramil Əliyev çıxış edərək bildirib ki, “Bu cür tədbirlər yalnız bir xatirə mərasimi deyil, həm də gələcəyə inamın, birlik və həmrəyliyin güclənməsinin nümunəsidir. Əməkdaşlıqda gücümüzü birləşdirərək şəhid ailələri və qazilərimizin rifahına daha çox töhfə verməliyik.”
Cahan Holdinqin dəstəyi ilə təşkil olunan ziyafət şəhid və qazi ailələri üçün mənəvi dəstək, həmçinin unudulmaz bir həmrəylik bayramına çevrildi.