Azərbaycan poeziya məkanında hər bir şair öz taleyinin, gördüyü işin, yaşadığı həyatın daşıyıcısı və tərənnümçüsidir.

Tanınmış şair Faiq Balabəyli imzası da bu mənada seçilən, oxunan, imzalar içindən boy verib görünən  adlardan, imzalardan biridir. Onun poeziyasında təsadüfi duyğuların, sadəcə romantik misraların məhsulu deyil, yaşantıların, müşahidələrin – arxasında dəniz dalğalarının səsi, limanlarda keçən günlərin nəfəsi, sərt küləklərin izi var. Həyat yolunu dənizlə bağlayan Balabəyli yaşantılarını, dənizin dərinliyini, həyəcanını poeziyaya gətirə bilmişdir.

O, qələm ilə poeziya və dənizçi taleyinin eyni zamanda ayrılmaz hissəsinə çevrilib.
Beləcə, Azərbaycan ədəbiyyatı onin timsalında, dənizçi şair obrazını qazanmışdır. O, dənizdən daha çox yazan, dənizi daha yaxından tanıyan, dənizlə həmsöhbət olan, dil tapan, şeirləri ilə dənizi oxucu ilə tanış edə bilən peşəkar qələm adamıdır, desək ifrata varmarıq.

Faiq Balabəylinin poetik dünyası çoxşaxəlidir, onun yaradıcılıq nümunələri əsasən üç böyük mövzu üzərində qurulmuşdur:
Onun şeirlərində dəniz sadəcə coğrafi məkandırmı? Yox. Dəniz onun üçün həm taledir, həm də ilham qaynağı. Dənizə yazdığı şerlərində, şair dənizi gah uşaq kimi qəlbini ovunduran, gah da sərt atəş kimi çırpınan qüvvə kimi təsvir edir. Burada dəniz həm insan taleyinin varlığını, həm də şairin ruhunun dənizələ doğma olduğunu göstərir.
Yazılan şeirlərində şairin lirizmi daha açıq görünür. Burada sevgi bir liman kimi təqdim olunur.Gəmilər necə limana yan alırsa, oxucu  qəlbi də Balabəyli poeziyasındakı sevgidə sakitlik tapır. Ayrılıq isə tufanlı dənizə bənzədilir: arxasında darıxmaq, gözləmək və ümid var.

Faiq Balabəyli yalnız lirik şair deyil, həm də publisist ruhlu poeziyanın, nəsr əsərlərinin, publisistik kitabların müəllifidir. “Bakı buxtası, 20 Yanvar”, “Kəsilməyən həyacan fiti”, “Onlar qəhrəmandır”,  “Dənizçilərimiz Vətən müharibəsində” kitablarındakı əsərləri ilə şair tarixi yaddaşı publisistik əsərlərinin vasitəsilə qoruyur. Burada dənizçi baxışı ilə qəhrəmanlıq, milli qeyrət və şəhidlik mövzusu təqdim olunur.
Faiq Balabəylinin poeziyası Azərbaycan ədəbiyyatında xüsusi yer tutur, şairin həm də dənizçi olması bunu deməyə əsas verir. O, dənizi ədəbiyyata hər hali ilə gətirən şairdir.

Damət Salmanoğlu
Şair,publisist