Azərbaycan ərazilərində qanunsuz məskunlaşmış ermənilərin həmin əraziləri tərk edərkən yaşayış evlərini yandırması, meşələrə od vurması Ermənistanın vandal siyasətinin növbəti dəfə bariz sübutudur. Eyni zamanda, bütün bu əməllər beynəlxalq hüquq normalarının kobud şəkildə pozulması deməkdir. Bütün dünya növbəti dəfə Ermənistanın necə vandal və terror dövlət olmasına şahidlik edir. Ermənilər unutmamalıdırlar ki, törətdikləri istənilən təxribatın və vandalizmin məsuliyyətini elə özləri daşıyır.Bunu AZƏRTAC-a açıqlamasında Milli Məclisin deputatı Sədaqət Vəliyeva deyib.Deputat bildirib ki, artıq Ermənistanın zaman uzatmaq üçün heç bəhanəsinə yer yoxdur və Ali Baş Komandan İlham Əliyevin dediyi kimi, heç bir statusdan söhbət belə gedə bilməz. Ermənistan hakimiyyəti və Ermənistandakı revanşist qüvvələr birmənalı şəkildə anlamalıdır ki, törədilən istənilən təxribatın qarşısı Azərbaycan Ordusu tərəfindən layiqincə alınacaq. Bu təxribatlar dalana dirənmiş və böhran içində çabalayan Ermənistan üçün ağır nəticələnəcək.“Ona görə də yaxşı olar ki, təxribatlar və ölkəmizin təbii sərvətlərinə qarşı vandalizm aktı törədərək öz xain xislətlərini nümayiş etdirmək əvəzinə, Azərbaycanın onlara verdiyi tarixi şansı dəyərləndirsinlər. Prezident, Ali Baş Komandan İlham Əliyevin bütün xəbərdarlıqlarından nəticə çıxarsın, İkinci Qarabağ müharibəsindəki ağır məğlubiyyətlərini və “dəmir yumruğ”un gücünü unutmasınlar. Çünki ani bir unutqanlıq Ermənistanın bir dövlət kimi məhvinə gətirib çıxara bilər”, - deyə S.Vəliyeva qeyd edib.