Azərbaycan Respublikasının Niderland Krallığındakı Səfirliyi, Haaqa şəhər Meriyasının patronajlığı ilə təşkil olunan və artıq ənənəyə çevrilmiş “Səfirlik Festivalı”nda iştirak edib.

Qlobal sülh və ədalətin simvolu sayılan Haaqanın mərkəzində – tarixi Lange Voorhout meydanında baş tutan bu möhtəşəm tədbir, bu il də dünya xalqlarının zəngin mədəni irsini bir araya gətirərək “bir gündə dünya səyahəti” devizi altında minlərlə ziyarətçiyə unudulmaz anlar yaşadıb. Tədbirdə təxminən altmış ölkə öz milli pavilyonları ilə iştirak edərək, milli dəyərlərini nümayiş etdiriblər.

Bu mötəbər mədəniyyət platformasında qurulan Azərbaycan pavilyonu, öz zənginliyi və rəngarəngliyi ilə festivalın ən çox ziyarət olunan guşələrindən birinə çevrilib. Burada təqdim olunan Azərbaycanın tarixi, mədəniyyəti, turizm potensialına aid materiallar və ekspanatlar, o cümlədən xalça nümunələri və milli geyimlərimiz, eləcə də plov, dolma, kabab, qutab, milli şirniyyatlar kimi ləziz mətbəx nümunələri ziyarətçilərin böyük marağına səbəb olub. Azərbaycan mədəniyyətinin dadı, rəngi və ruhu bu pavilyonda bir araya gələrək ölkəmizi ləyaqətlə təmsil edib.

Haaqa şəhərinin meri Yan van Zanen Azərbaycan pavilyonuna baş çəkərək, Azərbaycanın Niderlanddakı səfiri Məmməd Əhmədzadə və orada toplaşmış soydaşlarımızla səmimi söhbət aparıb. O, ölkəmizin festivalda fəal iştirakı ilə bağlı məmnunluğunu ifadə edib, Azərbaycan xalqının zəngin mədəni irsi və qonaqpərvərlik ənənələrinə duyduğu dərin heyranlığını bölüşüb.

Festival çərçivəsində təşkil olunan musiqi proqramında Avropada yaşayan həmvətənlərimizdən ibarət “Qafqaz” rəqs qrupu səhnəyə çıxaraq, Azərbaycan milli rəqslərini təqdim edib. Rəqslərimizin ritmi, estetikası və enerji dolu hərəkətləri festival tamaşaçılarını valeh edib, ifalar böyük alqış və coşqu ilə qarşılanıb. O qədər təsirli bir atmosfer yaranıb ki, çoxsaylı ziyarətçi rəqqaslara qoşularaq Azərbaycan milli rəqslərini, o cümlədən “Yallı” rəqsini birlikdə ifa edib milli mədəniyyətimizə öz rəğbətlərini nümayiş etdiriblər. Bu məqam, təkcə mədəniyyətimizin deyil, həm də birliyimizin və enerjimizin təntənəsinə çevrilib.

Bu festival, Azərbaycan mədəniyyətinin beynəlxalq platformada uğurla tanıdılması baxımından önəmli addım olmaqla yanaşı, xalqımızın irsini, qonaqpərvərliyini və yaradıcı ruhunu bir daha nümayiş etdirib.