27 fevral 2025-ci il tarixində Yuxarı Avstriyanın paytaxtı Linz şəhərində böyük mədəniyyət mərkəzi olan “Ticarətçilər Cəmiyyətinin Sarayı”nda (Palais Kaufmannischer Verein) İtaliya mədəniyyətinə həsr olunmuş möhtəşəm ədəbi-musiqi gecəsi keçirilmişdir. “Bechiştein” Piano Mərkəzi və Società Dante Alighieri təşkilatının təşkilatçılığı ilə keçirilən tədbirdə çıxış edən Piano Mərkəznin rəhbəri Georq Vizenger və Società Dante Alighieri (Avstriya-İtaliya) Cəmiyyətinin Linzdəki nümayəndəsi bildirmişlər ki, tədbir İtalyan mədəniyyətinin şeir və musiqisindən ibarət olan nümunələrinin təqdimatına həsr olunmuşdur. Belə ki, tədbiri təşkil edən və hazırda bütün dünyada 500-dən çox komitə və filialdan ibarət geniş şəbəkəyə malik olan bu təşkilat, hələ 1889-cu ildə şair və ədəbiyyat üzrə Nobel mükafatı laureatı Ciozue Karduççinin rəhbərliyi altında bir qrup italyan ziyalısı tərəfindən İtalyan dilinin və mədəniyyətinin dünyada qorunması və yayılması məqsədilə yaradılmış, böyük italyan şairi, yazıçısı, siyasi xadimi olmuş və italyan dilinin atası hesab edilən Dante Alighierinin adını daşımaqla, ümumilikdə 200.000-ə yaxın üzvüləri ilə təmsil olunmaqdadır. Keçirilən ədəbi-musiqili gecənin proqramında həmin təşkilatın nümayəndələri, tanınmış şairə xanım Sigrid Obermairin yazdığı yeni şeirlərinin təqdimatı və bəstəkar Gerhard Strizlin əsərləri daxil edilmişdir. Bəstəkar Gerhard Strizlin əsərlərinin ifası bədii gecənin musiqi hissəsinin ifaçısı Beynəlxalq Müsabiqələr laureatı, “Qran Pri” mükafatçısı, Avstriyanın Anton Brukner adına Konservatoriyasının tələbəsi, gənc azərbaycanlı pianoçu Ayan Məmmədliyə həvalə edilmişdir. Avropada təhsil aldığı ötən 4 il ərzində Avropa və Amerika səhnələrində 30-a yaxın solo konsertlər verən Ayan Məmmədli ilk fürsətdə hər zaman olduğu kimi, bu dəfə də bu konserti də öz doğma Vətəninin musiqisi ilə açdı. Gənc musiqiçi konsertin proqramına daxil edilmiş Şopenin, Şumanın və Gerhard Strizlin əsərlərindən əvvəl, Vaqif Mustafazadənin “Mart” əsəri ilə ilk musiqi tövhəsini təqdim etdi. Gənc azərbaycanlı sənətçi yalnız Avopa tamaşaçısından ibarət olan auditoriyanı deyil, həm də italyan mədəniyyət xadimlərini öz ifaları ilə valeh edib. Tədbirin sonunda həm tədbir təşkilatçılarının, həm də yerli tamaşaçıların onun ünvanına söylədikləri xoş sözlər və Avropa mətbuatında artıq dərc olunmağa başlayan dəyərli fikirlər bir azərbaycanlı gəncinin böyük uğuru deməkdir!