17 fevral 2026-cı il tarixində Naxçıvan Dövlət Universitetinin İnnovasiyalar Mərkəzində “Zəfərdən Suverenliyə: Qanla yazılan tarix” adlı forum uğurla təşkil olundu. Savefuture.az xəbər verir ki, forum Azərbaycan Respublikasının Gənclər Fondunun maliyyə dəstəyi, “Gənclərin Töhfəsi” İctimai Birliyinin təşkilatçılığı və Naxçıvan Dövlət Universitetinin tərəfdaşlığı ilə həyata keçirildi.
Tədbirin əsas məqsədi Azərbaycan xalqının 44 günlük Vətən müharibəsində qazandığı tarixi Zəfərin siyasi, hüquqi və ideoloji nəticələrinin gənclər arasında sistemli şəkildə təbliği, milli suverenlik anlayışının möhkəmləndirilməsi, dövlətçilik düşüncəsinin gücləndirilməsi və gənclərin vətənpərvərlik ruhunda maarifləndirilməsi idi.
Forum Azərbaycan Respublikasının Dövlət Himninin səsləndirilməsi və Vətən uğrunda canlarını fəda etmiş şəhidlərin əziz xatirəsinin bir dəqiqəlik sükutla yad edilməsi ilə başladı. Tədbiri giriş sözü ilə “Gənclərin Töhfəsi” İctimai Birliyinin layihə rəhbəri Məhsəti Hüseynova açaraq forumun konseptual məqsədləri barədə ətraflı məlumat verdi.
Daha sonra “Gənclərin Töhfəsi” İctimai Birliyinin sədri Asim Vəliyev çıxış edərək bildirdi ki, suverenlik anlayışı təkcə ərazi bütövlüyü ilə məhdudlaşmır, həm də milli kimlik, hüquqi mövqe və ideoloji dayanıqlılıq deməkdir.
Həmçinin rəsmi hissədə Naxçıvan Dövlət Universitetinin Tələbələrlə iş və tədbirlərin təşkili şöbəsinin müdiri Hüseyn İmanov, millət vəkili, şəhid qardaşı Üzeyir Məmmədov, millət vəkili, şəhid anası Gülşad Rüstəmova, Naxçıvan Muxtar Respublikasının Gənclər və İdman Nazirliyinin əməkdaşı İlahə Haqverdiyeva, Naxçıvan Hərbi Kollecinin rəisi, polkovnik Yaşar Hüseynov, Naxçıvan Yazıçılar Birliyinin sədri Asim Yadigar, Naxçıvan Musiqi Kollecinin direktoru Məhəbbət Babayeva, NDU nəzdində Texniki Kollecin direktoru Asəf Ruşənov, “Gənclərin Töhfəsi” ictimai birliyinin idarə heyətinin üzvü Mirsirac Siraclı çıxış edərək forumun işinə uğurlar arzuladılar.
Forum çərçivəsində vətənpərvərlik və ictimai fəaliyyət sahəsində fərqlənmiş şəxslərə plaketlər təqdim olundu.
Fəal gənc Aydan Hüseynova “Qarabağ Azərbaycandır!” adlı şeiri səsləndirərək tədbirə emosional çalar əlavə etdi.
“Zəfərdən Suverenliyə” adlı I panel çərçivəsində çıxış edən spikerlər Zəfərin yalnız hərbi qələbə olmadığını, eyni zamanda siyasi iradə, hüquqi legitimlik və milli ideologiyanın güclənməsi ilə nəticələnən tarixi mərhələ olduğunu müxtəlif aspektlərdən təhlil etdilər.
I paneldə Naxçıvan Yazıçılar Birliyinin sədri, şair-publisist, Asim Yadigar, Naxçıvan Dövlət Universitetinin Tarix üzrə fəlsəfə doktoru Zamin Əliyev, Naxçıvan Dövlət Universitetinin müəllimi Nazlı Yaqubova çıxış etdi.
“Dəyərlər və Gənclik” adlı II Panel çərçivəsində çıxış edən spikerlər Zəfərdən sonrakı mərhələdə gənclərin üzərinə düşən tarixi məsuliyyət, milli-mənəvi dəyərlərin qorunması və intellektual inkişafın dövlət quruculuğunda rolu barədə geniş fikir mübadiləsi apardılar. Panel müzakirələri göstərdi ki, suverenliyin möhkəmlənməsi yalnız siyasi və hərbi faktorlarla deyil, eyni zamanda düşüncəli, savadlı və milli mövqeyi aydın olan gənc nəslin formalaşması ilə mümkündür.
II paneldə Azərbaycan Respublikasının Gənclər Fondunun Naxçıvan filialının əməkdaşı Fatimə Yusifli, Bakı Dövlət Universitetinin tələbəsi, “Gənclərin Töhfəsi” İctimai Birliyinin fəalı Aysu Hüseynova, Gənclərin İntellektual İnkişaf Mərkəzi İctimai Birliyinin sədri Valeh Mahmudov, NDU nəzdində Texniki Kollecin direktoru Asəf Ruşənov çıxış etdi.
II Panel müzakirələri göstərdi ki, dəyərlər üzərində qurulan gənclik modeli Azərbaycanın gələcək inkişafının əsas təminatıdır.
Forum xatirə fotosu və çay-kofe fasiləsi ilə yekunlaşdı. Həmçinin forum iştirakçısı olan gənclərə layihə çrəçivəsində hazırlanmış kitabçalar və sertifikatlar təqdim olundu.