
Ağdam bu gün Azərbaycanın siyasi qətiyyətinin və quruculuq əzminin təcəssümüdür
"20 Noyabr – Ağdam Şəhəri Günü Azərbaycan dövlətçiliyinin şərəf salnaməsində xüsusi yeri olan tarixi gündür. Bir vaxtlar düşmən vandalizminin səssiz şahidinə çevrilmiş Ağdam bu gün Azərbaycanın yenilməz iradəsinin, siyasi qətiyyətinin və quruculuq əzminin təcəssümüdür. Bu torpağın hər qarışında tariximizin ağrısı, xalqımızın mübarizə əzmi və Zəfərimizin əzəməti yaşayır".
Bunları “Aztəminatlı ailələrə sosial-psixoloji dəstək” İctimai Birliyinin sədri Suzana Məmmədova deyib. O bildirib ki, Prezident, Müzəffər Ali Baş Komandan İlham Əliyevin rəhbərliyi ilə qazanılan tarixi Qələbə Ağdamın taleyini dəyişərək milli yaddaşımızda yeni bir dövrün başlanğıcını qoydu:
"Bu gün Ağdamın yenidən qurulması Azərbaycanın qalib dövlət statusunun, gələcəyə hesablanmış strateji inkişaf siyasətinin parlaq ifadəsidir.
Ağdamın dirçəlişi Azərbaycanın gücünün, suverenliyinin və tarixi ədalətin təntənəsidir!
Şəhidlərimizin əziz xatirəsi qarşısında ehtiramla baş əyir, bu Zəfəri bizə yaşadan qəhrəmanlarımıza minnətdarlığımızı bildiririk. Ağdam bizim tariximiz, qürurumuz və gələcəyə uzanan Zəfər yolumuzdur!"
Anar




