Azərbaycan Respublikasının Çex Respublikasındakı səfirliyinin təşkilatçılığı ilə Praqada Zəfər Günü və “Şuşa İli”nə həsr olunmuş tədbir keçirilib.AZƏRTAC xəbər verir ki, tədbirdə Çex Respublikasının müxtəlif dövlət strukturlarının nümayəndələri, bu ölkədə akkreditə olunmuş 20-yə yaxın səfir və diplomatik korpusun digər nümayəndələri, işgüzar və elmi dairələr, gənclər və icma təşkilatlarının üzvləri, habelə həmvətənlərimiz olmaqla, ümumilikdə 100-dək qonaq iştirak edib.Ölkəmizin Çexiyadakı səfiri Adış Məmmədov tədbiri açaraq Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində müzəffər Ordumuzun cəbhədə misilsiz şücaət göstərərək əzəli torpaqlarını erməni işğalından azad etdiyini bildirib. A.Məmmədov 8 Noyabr–Zəfər Gününün müasir Azərbaycan tarixindəki müstəsna əhəmiyyətindən danışaraq, iki il əvvəl Azərbaycanın torpaqlarını işğaldan azad etməklə təkcə öz ərazi bütövlüyünü deyil, həmçinin tarixi ədaləti bərpa etdiyini, beynəlxalq hüququn norma və prinsiplərinin yerinə yetirdiyini vurğulayıb. Səfir Azərbaycanın 30 ilə yaxın mövcud olmuş münaqişəni geridə qoyduğunu və nəhayət onilliklər ərzində fundamental hüquqları pozulan azərbaycanlı məcburi köçkünlərin tezliklə öz doğma yurdlarına təhlükəsiz şəkildə geri dönəcəklərini diqqətə çatdırıb.Diplomat hazırda regionumuzda yeni reallıqların yarandığını, sülh və sabitliyin möhkəmləndirilməsi, bölgənin yeni inkişaf mərhələsinə qədəm qoyması üçün əlverişli zəminin yarandığını bildirib. O, işğaldan azad olunmuş ərazilərdə yenidənqurma və bərpa işləri, habelə əhəmiyyətli infrastruktur layihələri həyata keçirən Azərbaycanın regionda sülh və əməkdaşlığı təşviq etdiyini deyib.Azərbaycan xalqının tolerant xalq olduğunu diqqətə çatdıran səfir Prezident İlham Əliyevin apardığı siyasi kursun mehriban qonşuluq, regional əməkdaşlıq formatlarının yaradılması kimi prinsiplər üzərində qurulduğunu bildirib, habelə dövlətimizin Ermənistanla münasibətlərin normallaşmasına hazır olduğunu və bu ilin sonuna qədər aparılan danışıqlar nəticəsində Ermənistan ilə Azərbaycan arasında sülh müqaviləsinin imzalanacağına ümidvar olduğunu qeyd edib.Sonra səfir 44 günlük Vətən müharibəsi dövründə azad edilən Şuşa şəhərinin xalqımızın tarixi və mədəniyyətindəki xüsusi yeri haqqında danışıb. Diplomat Azərbaycanın mədəniyyət paytaxtı olan Şuşa şəhərinin 270 illik yubileyi ilə əlaqədar Prezident İlham Əliyev tərəfindən 2022-ci ilin “Şuşa İli” elan edildiyini tədbir iştirakçılarının diqqətinə çatdırıb. Adış Məmmədov şəhərin tarixi və zəngin mədəniyyəti barədə məlumat verərək, Şuşanın Azərbaycan xalq musiqisinin inkişafında və formalaşmasında müstəsna xidmətləri olmuş bəstəkar və xanəndələr yetişdirdiyini qeyd edib. Səfir, həmçinin erməni vandalizminin qurbanı olmuş Şuşada aparılan bərpa işləri, habelə burada keçirilən beynəlxalq festival və digər tədbirlər barədə məlumat verib və Qarabağın tacının hər bir azərbaycanlının mənəvi varlığının ayrılmaz hissəsi olduğunu vurğulayıb.

Daha sonra səfir “Şuşa İli” çərçivəsində səfirliyin təşəbbüsü və dəstəyi ilə Azərbaycan Yazıçılar Birliyinin üzvü, Çexiyada yaşayan azərbaycanlı yazıçı Leyla Begimin şeir, poema və povestlərindən ibarət “Qarabağnamə” kitabının işıq üzü gördüyünü deyib, öz əsərlərini Şuşaya və ümumilikdə Qarabağa həsr etdiyinə, doğma vətənimiz Azərbaycana böyük sevgisinə görə ona təşəkkürünü ifadə edib.

Tədbirdə çıxış edən Türkiyə Respublikasının səfiri Egemen Bağış Azərbaycan torpaqlarının qəhrəmancasına mübarizə nəticəsində qazanıldığını vurğulayaraq, Zəfər Günü münasibətilə Azərbaycan xalqını və Hökumətini təbrik edib.

Səfir uzaqgörən Lider, ulu öndər Heydər Əliyevdən sitat gətirərək, Türkiyə və Azərbaycanın bir millət, iki dövlət olduğunu qeyd edib və Azərbaycanın sevincinin Türkiyənin sevinci, kədərinin isə Türkiyənin kədəri olduğunu bildirib. Egemen Bağış, Prezident İlham Əliyev ilə Prezident Rəcəb Tayyib Ərdoğanın bir-birilərini qardaş hesab etdiklərini, Çexiyada ölkəsi ilə yanaşı, Azərbaycanı da təmsil etməkdən qürur duyduğunu bildirib.

Azərbaycan Ordusunun tarixi Qələbəsinin regionda davamlı sülh və əmin-amanlıq toxumlarını səpdiyini bildirən Egemen Bağış Cənubi Qafqazda təhlükəsizliyin, sabitliyin və əməkdaşlığın təşviq edilməsi üçün Türkiyənin qardaş Azərbaycan xalqının yanında olmağa davam edəcəyini və işğaldan azad edilmiş ərazilərdə quruculuq işlərinin görülməsinə töhfə verəcəyini diqqətə çatdırıb.

Tədbirdə, həmçinin səfirlik tərəfindən Vyanadan dəvət olunmuş beynəlxalq musiqi müsabiqələrinin qalibi Jalə Rəsulova (piano) və Aleksandra Tirsunun (skripka) ifasında məşhur Azərbaycan və dünya bəstəkarlarının əsərlərindən ibarət klassik musiqi əsərləri səsləndirilib.

Mərasimdə Şuşa şəhərinin təməlinin qoyulmasının 270 illiyinə dair videoçarx nümayiş olunub, zəngin milli mətbəximizin nümunələrindən ibarət ziyafət təqdim edilib.

Sonda çıxış edən Leyla Begim kitabının ərsəyə gəlməsində göstərdiyi təşəbbüs və dəstəyə görə səfirliyə təşəkkürünü bildirib və öz ədəbi fəaliyyəti, habelə “Qarabağnamə” kitabının məzmunu haqqında iştirakçılara məlumat verib. Leyla Begim nəsr və nəzm əsərlərinin yer aldığı kitabını Qarabağa həsr etdiyini vurğulayaraq, nəşrin ərsəyə gəlməsinə illərin sərf olunduğunu bildirib. Sonda müəllifin imzası ilə iştirakçılara kitabın nüsxələri hədiyyə edilib.