2024-cü il 20-22 iyulda “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumu keçirildi.

Azərbaycan Prezidenti cənab İlham Əliyevin "Yalan məlumatların ifşası: Dezinformasiyaya qarşı mübarizə" mövzusunda 2-ci Şuşa Qlobal Media Forumundakı çıxışı, tədbir iştirakçıları ilə görüşü Foruma göstərilən böyük diqqətin əyani təsdiqi idi.

Forumun artıq ənənəyə çevrilərək hər il dünyanın müxtəlif ölkələrindən gələn çoxsaylı qonaqlara ev sahibliyi edir. Müasir informasiya mühitində dezinformasiyanın sürətlə yayıldığını və Şuşa Qlobal Media Forumu çərçivəsində çağdaş dünyada dezinformasiya barədə əhatəli təsəvvür formalaşdırıldı, həmçinin bu problemin səbəb olduğu genişmiqyaslı mənfi nəticələrin təhlili ətrafında geniş fikir mübadiləsi aparıldı, önəmli mesajlar verildi.

50 ölkədən 150-dən çox xarici qonağın, o cümlədən 30-a yaxın ölkənin informasiya agentliyinin, 3 beynəlxalq təşkilatın və 82 media qurumunun nümayəndələrinin qatıldıqları Şuşa Qlobal Media Forumu dünya mediası üçün mühüm platforma rolunu oynayır və Forum vasitəsilə Şuşadan dünyaya növbəti dəfə önəmli mesajlar verildi.

Forum çərçivəsində 4 panel sessiya - “Təsirin qiymətləndirilməsi: Dezinformasiyanın əhatə dairəsini müəyyənləşdirmək”, “Dezinformasiyaya qarşı daha davamlı cəmiyyət qurmaq üçün siyasət və təşəbbüslər”, “Süni intellektin reallığa, mediaya və dezinformasiyaya təsiri: Media savadlılığının təşviqi” və “İqlim hərəkatı və media” mövzularında təşkil olundu. Panel sessiyalarda müxtəlif ölkələrdən olan rəsmilər, media və vətəndaş cəmiyyəti, dövlət və biznes nümayəndələri, beynəlxalq təşkilatların təmsilçiləri və media ekspertləri ətraflı fikir və təcrübə mübadiləsi apardı.

Forumda həmçinin, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ilə əlaqədar həyata keçirilən tədbirlər və hazırlıq işləri, ölkə səviyyəsində iqlim dəyişikliyinin təsirləri ilə aparılan mübarizə, azad edilmiş ərazilərdə bərpa və yenidənqurma prosesində sərgilənən dayanıqlı yanaşma barədə məlumat verildi.

Prezident cənab İlham Əliyev Forumun açılış mərasimində dezinformasiyanın artıq həyat tərzinə çevrildiyini bildirib: "Təəssüf ki, bu, bizim artıq həyat tərzimizin bir hissəsinə çevrilibdir. Bəzən biz təəccüblənirik ki, Azərbaycan haqqında beynəlxalq mediada yayılan məlumatlar həqiqətə uyğun olmur - yəni, faktların manipulyasiyası, yanlış narrativlər. Biz uzun illər ərzində bunun qurbanı olmuşuq, əlbəttə ki, onlardan biri Ermənistan və Azərbaycan arasındakı münaqişə idi və bütün erməni diasporunun səfərbər olması idi".

Dövlət başçısı medianın xüsusi əhəmiyyətə malik olduğunu vurğuladı. "Əlbəttə, biz çox arzu edirik ki, media obyektiv olsun, hər kəs obyektiv olsun. Ancaq medianın xüsusi məsuliyyəti var. Çünki medianın mesajları, məsələni işıqlandırması bir çox insanların həyatına təsir edir"

Əsas müzakirə mövzuları Azərbaycan həqiqətlərinin dünyaya çatdırılması, Azərbaycana qarşı qlobal miqyaslı hücumlar, Azərbaycan-Ermənistan sülh müqaviləsinin imzalanma perspektivləri, bölgədə gedən proseslərin təsnifatı, Azərbaycanın digər iri dövlətlər tərəfindən təzyiqə məruz qalmasının səbəbləri və digər problemlər idi.

Üç saatdan artıq Cənab Prezident müxtəlif məzmunlu beynəlxalq medianın nümayəndələrinin suallarını cavablandırdı. Cənab İlham Əliyev forumda sualları cavablandırarkən əsl gerçəkliklər barədə vacib mesajlar verdi.

Dezinformasiyaya qarşı mübarizə, yalan məlumatların ifşası Forumun əsas müzakirə mövzularından biri oldu. Texnologiyaların inkişafının medianı yeni problemlərlə qarşılaşdırdığı da vurğulandı. Bu mənada Forum çərçivəsində aparılan müzakirələr həm ümumi dünyadakı bütün medianın gələcək aqibəti, həm də Azərbaycan mediasının peşəkarlaşması baxımından mühüm əhəmiyyətə malikdir.

Həmid MEHDİYEV,
Binəqədi rayon Ağsaqqallar Şurası İdarə Heyətinin üzvü