Azərbaycanın çoxşaxəli uğurlu xarici siyasətində Mərkəzi Asiya ölkələri ilə münasibətlər xüsusi yer tutur.  Azərbaycan Respublikasının Prezidenti cənab İlham Əliyevin Astanada təşkil olunan Mərkəzi Asiya Dövlət Başçılarının görüşündə fəxri qonaq qismində iştirak etməsi ölkələrimiz arasında mövcud dostluq, qardaşlıq münasibətlərinin və inkişaf etməkdə olan əməkdaşlığın əyani təzühürüdür.

Bu fikirləri saytımıza açıqlamasında VI çağırış Milli Məclisin deputatı Tamam Cəfərova deyib.

O bildirib ki, Azərbaycanın Mərkəzi Asiya dövlətləri ilə inkişaf edən və genişlənən əlaqələrini xarakterizə edən amillərdən biri də yüksəksəviyyəli qarşılıqlı səfərlərdir. Təsadüf deyil ki, son 2-3 il ərzində Prezident İlham Əliyev mütəmadi olaraq Mərkəzi Asiya dövlətlərinə, o regionda yerləşən ölkələrin başçıları isə Azərbaycana səfərlər edirlər. Daha dəqiq desək Prezident İlham Əliyevin son iki il ərzində Mərkəzi Asiya ölkələrinə 16 rəsmi səfəri olub. Həmin müddətdə Qazaxıstan, Qırğızıstan, Tacikistan və Özbəkistanın dövlət başçılarının Azərbaycana ümumilikdə 15 rəsmi səfəri olub. Həmin səfərlər zamanı imzalanan sənədlər ölkələr arasında əməkdaşlığın genişləndirilməsində olduqca mühüm rol oynayır.

Xalqlarımızı birləşdirən çoxəsrlik tarix, mədəniyyət, din və ortaq dəyərlər ölkələrimiz arasında günü-gündən daha da möhkəmlənən əlaqələrdə olduqca önəmli amildir. Azərbaycan və Mərkəzi Asiya ölkələri arasında qardaşlıq münasibətlərinin təzühürlərindən biri də Ermənistanın işğalından azad edilmiş Qarabağın bərpasına göstərilən dəstəkdir. Xatırladaq ki, Ermənistan tərəfindən təxminən 30 illik işğal dövründə bu ərazilərdə 9 şəhər və yüzlərlə yaşayış məntəqəsi məhv edilib. İşğaldan azad olunmuş ərazilərdə hazırda genişmiqyaslı bərpa işləri aparılır və keçmiş məcburi köçkünlərin öz doğma yurdlarına qayıdışı davam edir. Ötən il Füzuli şəhərində Özbəkistanın hədiyyəsi olan Mirzə Uluqbəy adına orta məktəbin, bu il isə Qazaxıstanın hədiyyəsi olan Kurmanqazı adına Uşaq Yaradıcılıq Mərkəzinin açılışı olub. Həmçinin bu il Ağdam rayonunda Qırğızıstanın hədiyyəsi olan orta məktəb binasının təməlqoyma mərasimi keçirilib.

Bu gün dünyada baş verən çətin və mürəkkəb proseslər, siyasi, iqtisadi katakilizmlər fonunda ölkələrimiz arasında dərinləşən dostluq və qardaşlıq münasibətləri olduqca mühüm əhəmiyyət kəsb edir. Cənab Prezident İlham Əliyevin çıxışında qeyd etdiyi kimi “Dünyada artan təhdid və çağırışlar ölkələrimiz arasında müdafiə və təhlükəsizlik sahəsində əməkdaşlığın daha da gücləndirilməsini tələb edir. Bu xüsusda, ötən ay Qazaxıstanda keçirilmiş və Azərbaycanın da iştirak etdiyi “Birləşdik-2024” beynəlxalq əməliyyat-taktiki komanda-qərargah təliminin əhəmiyyəti böyükdür”.

Əminliklə deyə bilərik ki, bu gün Azərbaycan və Mərkəzi Asiya ölkələri arasında münasibətlər daha da möhkəmlənərək, dinamik inkişaf yolu keçir. Ölkələrimiz arasında mövcud olan dostluq və qardaşlıq münasibətləri,  qarşılıqlı səfərlər zamanı imzalanan sənədlər və ən əsası beynəlxalq müstəvidə bir-birinə nümayiş olunan dəstək bunun əyani təzühürüdür.