Sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat mərhələsində Yeni Azərbaycan Partiyası tərəfindən 44  saylı Sumqayıt üçüncü seçki dairəsi üzrə deputatlığa namizədliyi irəli sürülmüş Mehriban Vəliyevanın Sumqayıt Tarix Muzeyində Sumqayıt şəhərinin 41A və 42-ci məhəllə ərazisində yaşayan seçicilərlə görüşü keçirilib.

Görüşü giriş sözü ilə açan YAP Sumqayıt şəhər təşkilatının sədri Ramiz Hüseynov partiyamızın hər zaman olduğu kimi bu seçkilərə də yüksək səviyyədə hazırlaşdığını vurğulayaraq möhtəşəm qələbə qazanacağına inamını ifadə edib.

Çıxış edən deputatlığa namizəd Mehriban Vəliyeva əvvəlcə fəaliyyəti barədə seçicilərə məlumat verib. O, Yeni Azərbaycan Partiyasının milli maraqları daim üstün tutduğunu və ölkəmizin inkişafında müstəsna rol oynadığını diqqətə çatdırıb.

Tədbirdə, həmçinin təşviqat qrupunun üzvləri Sovet Şükürov, Ramiz İsmayılov, Vətən Müharibəsi qazisi Hikmət Məmmədov və digərləri çıxış edərək ölkədə keçirilən hər bir seçkidə olduğu kimi, qarşıdan gələn parlament seçkilərində də YAP-ın namizədlərinin qələbə qazanacağına əminliklərini bildiriblər. Çıxış edənlər 1 sentyabrda Sumqayıt seçicilərini məntəqələrə gedərək YAP-ın namizədlərinə səs verməyə çağırıblar.

Sonda çıxış edən seçicilər Yeni Azərbaycan Partiyasının namizədi və onun səsləndirdiyi fikirlər ətrafında fikirlərini bildirib, təkliflərini səsləndiriblər və 1 sentyabr seçkilərində YAP-ın namizədinə səs verəcəklərini vurğulayıblar.