26 İyun – Azərbaycan Respublikasının Silahlı Qüvvələr Günü xalqımızın qürur və ehtiramla qeyd etdiyi ən əlamətdar tarixlərdən biridir. Bu gün yalnız hərbçilərimizin peşə bayramı deyil, həm də dövlətimizin qüdrətinin, xalqımızın milli birliyinin və müstəqilliyimizin etibarlı təminatçısı olan Azərbaycan Ordusunun şərəfli inkişaf yoluna verilən yüksək dəyərin ifadəsidir.

Azərbaycan milli ordusunun əsası 1918-ci il iyunun 26-da Azərbaycan Xalq Cümhuriyyəti tərəfindən qoyulub. Həmin gün Şərqdə ilk demokratik respublika öz milli silahlı qüvvələrinin yaradılması istiqamətində mühüm addım ataraq Əlahiddə Azərbaycan Korpusunun formalaşdırılması barədə qərar qəbul edib. Bununla da müasir Azərbaycan Ordusunun təməli qoyulub və milli hərb tariximizin yeni mərhələsi başlayıb.

Müstəqilliyimizin bərpasından sonra Azərbaycan ciddi siyasi, iqtisadi və hərbi sınaqlarla üz-üzə qaldı. Ermənistanın hərbi təcavüzü, daxildə hökm sürən qeyri-sabitlik, nizami ordunun tam formalaşmaması və müxtəlif silahlı dəstələrin fəaliyyəti dövlətçiliyimiz üçün ciddi təhdid yaradırdı. Məhz belə mürəkkəb bir dövrdə Ümummilli Lider Heydər Əliyevin hakimiyyətə qayıdışı Azərbaycan dövlətçiliyinin xilası ilə yanaşı, peşəkar milli ordunun yaradılması prosesinə də yeni nəfəs verdi.

Əslində müasir Azərbaycan Ordusunun formalaşmasının əsasları hələ Ulu Öndərin Naxçıvandakı fəaliyyət dövründə qoyulmuşdu. Naxçıvan Muxtar Respublikasında Dövlət Müdafiə Komitəsinin yaradılması, ilk milli hərbi hissələrin formalaşdırılması və müdafiə sisteminin təşkili istiqamətində atılan addımlar sonrakı illərdə ordu quruculuğunun möhkəm bünövrəsinə çevrildi. 1993-cü ildən sonra isə Silahlı Qüvvələrdə vahid komandanlıq sistemi yaradıldı, nizami hərbi hissələr formalaşdırıldı, peşəkar zabit korpusunun hazırlanmasına başlanıldı və müasir ordu quruculuğu strategiyası həyata keçirildi.

Ümummilli Lider Heydər Əliyevin 1998-ci il 22 may tarixli Fərmanı ilə iyunun 26-sı Azərbaycan Respublikasının Silahlı Qüvvələr Günü elan edildi. Bu qərar milli ordumuzun tarixi ənənələrinə verilən yüksək qiymətin və dövlətimizin orduya olan xüsusi münasibətinin bariz nümunəsi idi.

Prezident, Silahlı Qüvvələrin Ali Baş Komandanı İlham Əliyevin rəhbərliyi dövründə Azərbaycan Ordusu öz inkişafının ən qüdrətli mərhələsinə qədəm qoydu. Müdafiə sahəsinə ayrılan vəsaitin dəfələrlə artırılması, müasir silah və texnikaların alınması, müdafiə sənayesinin yaradılması, hərbi təhsil sisteminin təkmilləşdirilməsi və beynəlxalq standartlara uyğun islahatlar nəticəsində Azərbaycan Ordusu regionun ən güclü hərbi qüvvələrindən birinə çevrildi.

Qardaş Türkiyə ilə hərbi əməkdaşlıq, birgə təlimlər, komando birliklərinin yaradılması, NATO standartlarına uyğun idarəetmə mexanizmlərinin tətbiqi və müasir hərbi texnologiyaların orduda istifadəsi Silahlı Qüvvələrimizin imkanlarını əhəmiyyətli dərəcədə genişləndirdi. Eyni zamanda Pakistan və digər dost ölkələrlə inkişaf edən hərbi tərəfdaşlıq Azərbaycanın müdafiə potensialının daha da güclənməsinə mühüm töhfələr verdi.

Azərbaycan Ordusunun artan gücü ilk növbədə 2016-cı ilin Aprel döyüşlərində özünü göstərdi. Ermənistanın növbəti hərbi təxribatına cavab olaraq həyata keçirilən uğurlu əməliyyatlar nəticəsində strateji əhəmiyyətli mövqelər azad edildi və xalqımızın Böyük Qələbəyə olan inamı daha da möhkəmləndi.

Bu inam 2020-ci ilin 27 sentyabrında başlayan 44 günlük Vətən müharibəsində tarixi Zəfərlə nəticələndi. Ali Baş Komandan İlham Əliyevin rəhbərliyi altında Azərbaycan Ordusu müasir hərb tarixində nümunə kimi göstərilən əməliyyatlar həyata keçirərək Ermənistan ordusunu darmadağın etdi. Füzuli, Cəbrayıl, Zəngilan, Qubadlı, Suqovuşan, Hadrut, Şuşa və digər yaşayış məntəqələrinin işğaldan azad olunması ilə Azərbaycanın ərazi bütövlüyünün bərpası istiqamətində həlledici nəticə əldə edildi.

44 günlük Vətən müharibəsi Azərbaycan əsgərinin qəhrəmanlığını, xalq-ordu birliyini və dövlətimizin siyasi iradəsini bütün dünyaya nümayiş etdirdi. Şəhidlərimizin qanı, qazilərimizin fədakarlığı və xalqımızın həmrəyliyi sayəsində tarixi ədalət bərpa olundu, Azərbaycan xalqı özünün ən böyük Zəfərini qazandı.

2023-cü ilin sentyabrında həyata keçirilən lokal xarakterli antiterror tədbirləri isə Azərbaycanın dövlət suverenliyinin tam bərpasını təmin etdi. Bununla da ölkəmizin beynəlxalq səviyyədə tanınmış bütün ərazilərində Konstitusiya quruluşu bərpa edildi və Azərbaycan bayrağı suveren dövlətimizin bütün ərazilərində əzəmətlə dalğalanmağa başladı.

Bu gün Azərbaycan Ordusu yüksək döyüş hazırlığına malik, müasir texnologiyalarla təchiz olunmuş, peşəkar kadr potensialına sahib və zəngin döyüş təcrübəsi qazanmış güclü silahlı qüvvədir. Ordumuzun gücünün əsas mənbəyi isə xalqın ona olan sonsuz etimadı, hərbçilərimizin vətənpərvərliyi və dövlətimizin güclü siyasi iradəsidir.

26 İyun – Silahlı Qüvvələr Günü münasibətilə bütün hərbi qulluqçularımızı, şəhid ailələrini, qazilərimizi, müharibə veteranlarını və Azərbaycan Ordusunun sıralarında xidmət edən hər bir vətəndaşımızı ürəkdən təbrik edir, şəhidlərimizin əziz xatirəsini dərin ehtiramla yad edirik.

Bu gün hər bir azərbaycanlı qürurla deyə bilər ki, onun arxasında qalib xalqın Müzəffər Ordusu dayanır. Azərbaycan Ordusu bundan sonra da dövlətimizin müstəqilliyinin, suverenliyinin və təhlükəsizliyinin ən etibarlı təminatçısı olaraq xalqımıza xidmət edəcək.

Yaşasın Azərbaycan Ordusu! Yaşasın qalib Azərbaycan xalqı!

Süleyman Cəfərov, “Xüsusi Təyinatlı Qüvvələrin şəhid ailələri və veteranları” İctimai Birliyinin Abşeron rayon üzrə sədri