Müharibə dövründə hamımız bir şüarla yaşayırdıq – “Öldü var, döndü yoxdur!”

Bu, sadəcə bir şüar deyildi. Bu sözlər Vətən qarşısında verilmiş söz, ölümün gözünə dik baxaraq irəli getmək əzmi, torpağa bağlılığın və milli iradənin ifadəsi idi.

2020-ci ilin 27 sentyabrında Vətən müharibəsi başlayanda hər bir Azərbaycan əsgəri, zabiti və könüllüsü bilirdi ki, qarşıda bizi ağır sınaqlar gözləyir. Heç kim sabahını düşünmürdü. Heç kim “geri qayıdacağam, ya yox?” sualını vermirdi. Çünki hamının bir məqsədi var idi – işğal altında olan torpaqlarımızı azad etmək!

O günlərdə analar oğullarını cəbhəyə yola salır, atalar “Vətən sağ olsun” deyirdi. Əsgər ailəsindən ayrılarkən son dəfə doğmalarına baxır, amma gözlərində qorxu deyil, qürur olurdu.

Biz bilirdik ki, bu savaş təkcə torpaq savaşı deyil. Bu, Azərbaycanın haqq savaşıdır. Bu, şəhidlərimizin qanına, tariximizə, milli qürurumuza və gələcək nəsillərə olan borcumuz idi.

Bu böyük Zəfərin arxasında illərlə aparılan dövlət siyasəti, güclü ordu quruculuğu və milli həmrəylik dayanırdı. Ulu Öndər Heydər Əliyevin yaratdığı möhkəm dövlətçilik təməlləri üzərində Azərbaycan ordusu gücləndi, xalqımızın milli iradəsi daha da möhkəmləndi.

Ali Baş Komandan İlham Əliyevin rəhbərliyi ilə Azərbaycan Ordusu 44 günlük Vətən müharibəsində öz gücünü bütün dünyaya nümayiş etdirdi. Əsgər və zabitlərimiz döyüş meydanında tarix yazdılar. Şəhidlərimiz canları ilə, qazilərimiz sağlamlıqları ilə bu Zəfərin ən ağır yükünü daşıdılar.

Biz o günlərdə bir-birimizə deyirdik:

“Öldü var, döndü yoxdur!”

Bu sözün arxasında minlərlə qəhrəmanın iradəsi dayanırdı.

Kimi şəhid oldu, adı əbədi olaraq Azərbaycanın şanlı tarixinə yazıldı. Kimi yaralandı, həyatının bir hissəsini döyüş meydanında qoydu. Kimi isə müharibədən qayıtdı, amma artıq əvvəlki insan deyildi. Çünki müharibədən qayıdan hər bir əsgər özü ilə səngərin ağır xatirələrini, şəhid dostlarının əmanətini və Vətən qarşısında yeni məsuliyyət gətirdi.

Bu gün Qarabağda dalğalanan üçrəngli Azərbaycan bayrağı həmin günlərin cavabıdır.

Bu gün azad torpaqlarda qurulan hər bir yol, hər bir məktəb, hər bir ev şəhidlərimizin ruhuna yazılmış bir minnətdarlıqdır.

Amma bizim borcumuz yalnız Zəfəri xatırlamaq deyil.

Biz şəhidlərimizin adını yaşatmalı, qazilərimizin haqqını qorumalı, Vətən sevgisini gələcək nəsillərə ötürməliyik. Çünki Vətən müharibəsi yalnız bir tarix deyil – bu, Azərbaycan xalqının birlik, həmrəylik və fədakarlıq tarixidir.

O günlərdə biz ölümün qarşısında geri çəkilmədik.

Çünki bilirdik:

Vətən varsa, biz varıq.
Vətən yoxdursa, heç nəyin mənası yoxdur.

Bu gün azad Qarabağa baxanda bir daha anlayırıq ki, şəhidlərimizin verdiyi can, qazilərimizin çəkdiyi ağrı və əsgərlərimizin göstərdiyi qəhrəmanlıq heç vaxt unudulmamalıdır.

Biz qalib xalqıq. Amma bu Qələbənin məsuliyyəti də böyükdür.

Gəlin Zəfəri yalnız sözlə deyil, əməlimizlə yaşadaq. Şəhid ailəsinin qapısını döyək, qazinin yanında olaq, Vətənə sahib çıxaq, dövlətimizə və xalqımıza xidmət etməyi həyat amalına çevirək.

Çünki bu torpaq bizə asanlıqla verilməyib.

Bu torpaq qanla alınıb.

Və biz gələcək nəsillərə yalnız azad Qarabağ deyil, həm də Vətən uğrunda necə dayanmağı, necə mübarizə aparmağı və necə qalib gəlməyi miras qoymalıyıq.

Öldü var, döndü yoxdur!

Bu söz artıq sadəcə müharibə şüarı deyil.

Bu söz şəhidlərimizin əmanəti, qazilərimizin ağrısı, əsgərlərimizin andı və Azərbaycan xalqının yaddaşıdır.

Vətən uğrunda can verənləri unutmayaq!
Qazilərimizi tək qoymayaq!
Zəfərimizi qoruyaq!
Azərbaycanımızı daha da gücləndirək!

Çünki Vətən bizə əmanətdir!

 “Naxçıvan Qaziləri” ictimai birliyi sədri
Əli Əlisoy