Azərbaycan mətbuatının 147 illiyi münasibətilə Şuşada ilk Beynəlxalq Media Forumunun keçirilməsi olduqca əhəmiyyətli tarixi hadisə idi. Nəzərə almaq lazımdır ki, postmüharibə mərhələsinin reallıqlarının dünya ictimaiyyətinin diqqətinə davamlı olaraq çatdırılması mühüm əhəmiyyət daşıyır. Belə ki, Vətən müharibəsində tarixi Qələbə qazanaraq özünün güc mövqeyini formalaşdırmış ölkəmiz bunu daha da möhkəmləndirmək üçün media resurslarından səmərəli istifadə etməkdədir.

Bunu AZƏRTAC-a açıqlamasında Milli Məclisin deputatı Elşad Mirbəşiroğlu söyləyib.

E.Mirbəşiroğlu bildrib ki, xarici KİV-in nümayəndələrinin işğaldan azad edilmiş ərazilərə intensiv səfərlərinin təşkil olunması, erməni vandalizminin və işğalçılıq siyasətinin izlərinin onlara əyani şəkildə nümayiş etdirilməsi Azərbaycanın postmünaqişə vəziyyətində haqlı mövqelərinin dünyaya çatdırılması baxımından olduqca vacibdir. Bundan əlavə, Ermənistanın təcavüzkar və işğalçı dövlət obrazının beynəlxalq ictimaiyyətə tanıdılması baxımından da belə səfərlərin təsirli rolu var. “Şuşa İli” çərçivəsində məhz Şuşada Beynəlxalq Media Forumunun təşkil olunması çox əlamətdar hadisədir. Çünki Azərbaycanın mədəniyyət paytaxtı Şuşa həm də mühüm siyasi əhəmiyyət kəsb edir.

“Tarixi Azərbaycan torpağı olan Qarabağın tacı Şuşada təşkil edilən hər tədbir, xüsusilə beynəlxalq tədbir mühüm psixoloji təsirə də malikdir. Birincisi, dünya aydın görür ki, bu ərazilər azərbaycanlıların qədimdən yaşadıqları tarixi torpaqlarıdır. İkincisi, ermənilərin bu torpaqlarda ancaq dağıntılar törətdiklərini də dünya ictimaiyyəti görür. Bu isə elə ermənilərin özləri tərəfindən bu torpaqlarla heç bir bağlılıqlarının olmamasının etirafı kimi qəbul edilir. Üçüncüsü, dünya Azərbaycanın gücünü, potensialını bir daha görür. İşğaldan azad etdiyimiz ərazilərdə həyata keçirilən dinamik tikinti-quruculuq işləri bir daha sübuta yetirir ki, ölkəmiz hərtərəfli potensiala malikdir, Ermənistanın tamamilə dağıtdığı yaşayış və qeyri-yaşayış infrastrukturlarını öz resursları hesabına bərpa etmək iqtidarındadır. Bu baxımdan, bir daha vurğulamaq lazımdır ki, Şuşada təşkil olunmuş Beynəlxalq Media Forumu olduqca əhəmiyyətlidir”, - deyə deputat vurğulayıb.

Onun sözlərinə görə, iyirimi ölkədən media nümayəndələrinin Şuşaya səfərinin təşkil olunması, vacib mövzuların müzakirə olunduğu panellərin keçirilməsi həm məlumatlandırma, həm də maarifləndirmə baxımından səmərəli oldu. Eyni zamanda, ölkədaxili KİV nümayəndələrinin də ayrı-seçkilik olmadan forumda iştirakının təmin edilməsi ölkədə plüralist mühitin göstəricisi kimi qiymətləndirilməlidir.

Elşad Mirbəşiroğlu deyib: “Hesab edirəm ki, Şuşada keçirilmiş Beynəlxalq Media Forumundan sonra Azərbaycandakı həm ictimai münasibətlər, həm də postmünaqişə mərhələsinin reallıqları haqqında dünya ictimaiyyəti daha yaxından məlumatlanmış olacaq”.