Müzəffər Ali Baş Komandan, Prezident cənab İlham Əliyevin noyabr ayının 15-də  Albaniyaya  rəsmi səfəri iki ölkə arasında münasibətlərin inkişafı baxımından mühüm hadisədir.Azərbaycan və Albaniya arasında konstruktiv siyasi dialoq mövcuddur. Albaniya prezidentləri əvvəlki illərdə Azərbaycana dəfələrlə səfər etmişdilər. İki ölkə arasında siyasi dialoqun çox güclü dinamizmi və inkişaf perspektivləri mövcuddur.

Bu fikirləri saytımıza açıqlamasında Milli Məclisin üzvü Tamam Cəfərova deyib.

Deputat açıqlamasıında bildirib ki, Azərbaycan və Albaniyanın beynəlxalq təşkilatlardakı uğurlu əməkdaşlığı ölkələr arasında  əlaqələri daha da gücləndirir. Albaniya həmişə Azərbaycanın ərazi bütövlüyünü dəstəkləyib və bu dəstək həmişə qarşılıqlı olub. Həm işğal dövründə, həm İkinci Qarabağ müharibəsi dövründə Albaniya rəsmilərinin bəyanatlarını, Azərbaycanın ərazi bütövlüyünə göstərilən dəstək ölkəmiz tərəfindən yüksək qiymətləndirilir.

Millət vəkili Tamam Cəfərova qeyd edib ki, Azərbaycan Albaniyada qaz təsərrüfatının inkişafına öz töhfəsini verəcəkdir. Albaniyada bu günə qədər qaz şəbəkəsi yaradılmayıb. Azərbaycan bu istiqamətdə investor kimi iştirak edə bilər. Azərbaycan və Albaniya TAP layihəsinin üzvləridir və Cənub Qaz Dəhlizinin icrasında hər iki ölkə   çox önəmli rol oynayıblar. Azərbaycanın və Avropa İttifaqının sədrliyi ilə bu günə qədər keçirilmiş Cənub Qaz Dəhlizi Məşvərət Şurasının bir çox toplantılarında Albaniya nümayəndələri həmişə çox fəal iştirak etmişlər.Bu gün Azərbaycan qazı Avropanın enerji təhlükəsizliyinə də öz töhfəsini verir. Bu ilin iyul ayında Azərbaycanla Avropa Komissiyası arasında enerji sahəsində strateji əməkdaşlıq üzrə Anlaşma Memorandumu imzalanmışdır. Həmin Memorandum əsasında 2027-ci ilə qədər Avropaya gedən qaz təchizatı iki dəfə artırılacaqdır.

Şübhəsiz ki, qeyd etdiyimiz məsələlər Azərbaycan və Albaniya arasında münasibətlərin daha da inkişafına ciddi təkan verəcəkdir. Millət vəkili Tamam Cəfərova belə deyib.