Xəbər verildiyi kimi, noyabrın 25-də Bakıda, ADA Universitetində “Orta Dəhliz boyunca: geopolitika, təhlükəsizlik və iqtisadiyyat” mövzusunda beynəlxalq konfrans keçirilib. Tədbirin iştirakçıları arasında ABŞ, Belçika, Bolqarıstan, Böyük Britaniya, Fransa, İsrail, İsveçrə, İtaliya, Gürcüstan, Kanada, Misir, Pakistan, Polşa, Rumıniya, Rusiya və Türkiyənin aparıcı beyin mərkəzlərinin rəhbərləri və nümayəndələri də yer alıblar. Konfransda Orta Dəhlizin təhlükəsizlik aspektləri, regionun iqtisadi imkanları müzakirə olunub.

Ölkə başçısı çıxışı zamanı Zəngəzur dəhlizi ilə bağlı bəzi məsələlərə aydınlıq gətirib və Brüssel görüşündən imtinası ilə bağlı məsələləri önə çəkib.

Brüssel görüşündən imtina danışıqları hansı yönə istiqamətləndirəcək, bu Brüssel formatının iflası deməkdirmi, yoxsa başqa axının yaranmasıdır. Bu imtina hansı mesajları vermiş oldu?

YAP idarə heyətinin üzvü, politoloq Asif Əsgərli  açıqlamasında bildirib ki, Prezidentin Brüssel görüşündən imtina ilə bağlı verdiyi mesaj, heç də Azərbaycanın Qərblə,  Avropa İttifaqı ilə danışıqlardan imtinası anlamına gəlmir.

“Cənab Prezident çox aydın şəkildə bildirdi ki, digər vasitəçi kimi Fransanın danışıqlarda iştirakını istəmir. Bilirik ki, Ermənistan rəhbərliyi bundan əvvəlki görüşlərdə olduğu kimi, bu dəfə də Fransa Prezidentinin növbəti görüşdə iştirakını ciddi-cəhdlə önə çəkib. Son Praqa görüşündən sonra Fransa prezidentinin sərsəm, ədalətsiz, açıq-aşkar işğalçını dəstəkləyən mövqeyi, Senatın Azərbaycanı ittiham edən qərarından sonra Azərbaycan Fransa ilə bir masada otura bilməz. Ona görə də Fransanın danışıqlarda hər hansı formada iştirakını rədd edirik. Amma bu Brüssel formatının iflasa uğraması anlamına gəlmir. Azərbaycan Avropa İttifaqı ilə keçirilən danışıqları alqışlayır. Eyni zamanda Rusiyanın, Vaşinqtonun təşəbbüsləri qəbul olunur. Bu imtina sırf Fransanın ədalətsiz mövqe sərgiləməsinə qarşıdır”.

Versus.az