Azərbaycan Respublikasının Prezidenti İlham Əliyevin cari ilin 14 dekabr tarixində Türkmənistanda təşkil olunmuş Üçtərəfli Zirvə görüşündə iştirakı bir daha təsdiq etmişdir ki, Azərbaycan, Türkiyə və Türkmənistan ortaq mənəvi dəyərlər, dini-mədəni köklər, etnik və dil baxımından biri-biri ilə sıx bağlı olan ölkələrdir.

Həmçinin qeyd etmək lazımdır ki, siyasi əlaqələrimiz də ən yüksək səviyyədədir. Türkiyə ilə 2021-ci ildə imzalanan Şuşa Bəyannaməsi iki dövlət arasında münasibətləri ən yüksək strateji müttəfiqlik səviyyəsinə ucaltmışdır, Türkmənistanla isə 2017-ci ildə Strateji tərəfdaşlıq haqqında Bəyannamə imzalanmışdır. Ökələrimiz həmçinin beynəlxalq təşkilatlar - BMT, İslam Əməkdaşlıq Təşkilatı, Türk Dövlətləri Təşkilatı, ATƏT və digər qurumlar çərçivəsində də səmərəli əməkdaşlıq edirlər.

Qədim tarixə söykənən münasibətlərimiz müasir şəraitdə üç dövlət arasında iqtisadi, ticarət, nəqliyyat-logistika və digər sahələrdə əməkdaşlığın inkişafı üçün münbit şərait yaradır.

2022-ci ilin yanvar-oktyabr aylarında Azərbaycanın Türkiyə ilə ticarət dövriyyəsi 45 faiz artaraq, 5 milyard ABŞ dollarına çatmışdır. Azərbaycandan Türkiyə iqtisadiyyatına 20 milyard ABŞ dollara yaxın, Türkiyədən Azərbaycan iqtisadiyyatına isə 14 milyard dollara yaxın sərmayə yatırılmışdır. Bu il Türkmənistan ilə ticarət dövriyyəsi 5 dəfə artmışdır.

Azərbaycan, Türkiyə və Türkmənistan nəqliyyat-logistika sahəsində də ciddi uğurlara imza atmışlar ki, bu da öz növbəsində yeni, modern infrastrukturun yaradılmasını təmin edir və Azərbaycanın mühüm tranzit dövlətinə çevrilməsini təsdiq edir. Azərbaycan Şərq-Qərb və Şimal-Cənub nəqliyyat dəhlizlərinin fəal iştirakçısıdır və öz ərazisində dəmir yolu, avtomobil nəqliyyatı və hava nəqliyyatı ilə bağlı olan möhtəşəm layihələri həyata keçirmişdir. 2022-ci ilin ilk 10 ayında Azərbaycan ərazisindən keçən ümumi tranzit daşımalarının həcmi ötən ilin müvafiq dövrü ilə müqayisədə 80 faizdən çox artmışdır.

Azərbaycan Respublikası Prezidentinin səfəri zamanı imzalanan mühüm sənədlər – “Ticari-iqtisadi əməkdaşlıq haqqında Hökumətlərarası Saziş”; “2023-2025-ci illər üzrə elm, təhsil və mədəniyyət sahələrində əməkdaşlığa dair Hökumətlərarası Çərçivə Proqramı”; “Gömrük əməkdaşlığına dair Birgə məşvərət komissiyasının yaradılması haqqında qarşılıqlı anlaşmaya dair Hökumətlərarası Memorandum”; “Energetika sahəsində əməkdaşlığın inkişaf etdirilməsi ilə bağlı qarşılıqlı anlaşmaya dair Qurumlararası Memorandum”; “Nəqliyyat sahəsində əməkdaşlığın inkişaf etdirilməsi ilə bağlı qarşılıqlı anlaşmaya dair Qurumlararası Memorandum”, əyani sürətdə nümayış etdirdi ki, üç dövlət arasında əməkdaşlığın parlaq perspektivləri var və qələcəkdə yeni-yeni böyük layihələr uğurla həyata keçiriləcək.

Nizami Səfərov, Azərbaycan Respublikası Milli Məclisinin Hüquq siyasəti və dövlət quruculuğu komitəsinin üzvü