Azərbaycan dünyada etibarlı tərəfdaş ölkə kimi tanındığından bir çox ölkələrin marağını cəlb edir

 Bu gün Azərbaycan beynəlxalq münasibətlər sistemində müstəqil xarici siyasət yürüdən dövlət kimi tanınır. Bu ondan irəli gəlir ki, ölkəmizin beynəlxalq nüfuzunu artıran xarici siyasət kursu yürdülür. Prezident İlham Əliyevin uğurlu siyasəti sayəsində Azərbaycan dünyada tanınan nüfuzlu bir dövlətə çevrilib. 20 ilə yaxın müddətdə həyata keçirlən xarici siyasət sahəsində böyük dönüş yaranıb və uğurlar əldə olunub. Dünyanın aparıcı dövlətləri və beynəlxalq təşkilatları Azərbaycana ciddi diqqət yetirməyə başlayıb və ölkəmiz beynəlxalq münasibətlər sisteminin suveren aktoruna çevrilib. Azərbaycanın dövlət müstəqilliyinin möhkəmləndirilməsi istiqamətində görülən əsas işlərdən biri ölkənin dünya birliyinə inteqrasiyasının təmin olunmasıdır. Cənab Prezidentin milli maraqlara xidmət edən xarici siyasət uzaq hədəflərə hesablanmış strateji fəaliyyət konsepsiyası olmaqla, müstəqil Azərbaycanın beynəlxalq arenada nüfuz və mövqelərinin güclənməsinə, ümummilli problemlərinin həllinə yönəlib. Uğurlu xarici siyasət kursu nəticəsində beynəlxalq təşkilatlarla bərabərhüquqlu səviyyədə əməkdaşlıq müstəqilliyin əsas dayaqlarından birinə çevrilib. Kollektiv sənədlərə və beynəlxalq müqavilələrə qoşulan Azərbaycan özünün coğrafi mövqeyindən, təbii ehtiyatlarından, iqtisadi potensialından istifadə etməklə bir çox dövlətlər və beynəlxalq qurumlarla əməkdaşlıq edərək Böyük İpək yolunun bərpası, Avropa-Qafqaz-Asiya nəqliyyat dəhlizinin yaradılması, Xəzərin karbohidrogen ehtiyatlarının işlənməsi və dünya bazarına çıxarılması layihələrini səmərəli şəkildə həyata keçirir. Azərbaycan bütün bunları müxtəlif ölkələrlə sıx əməkdaşlıq çərçivəsində edir. Azərbaycan dünyada etibarlı tərəfdaş ölkə kimi tanındığından bir çox ölkələrin marağını cəlb edir. Bu baxımdan Serbiya Respublikası da Azərbaycanla çoxşaxəli əməkdaşlıq etməkdə maraqlıdır. Bildiyimiz kimi, dekabrın 21-də Serbiya Respublikasının Prezidenti Aleksandar Vuçiç ölkəmizə işgüzar səfərə gəlib. Prezident İlham Əliyev və Serbiya Respublikasının Prezidenti Aleksandar Vuçiç ilə təkbətək görüşündən sonra mətbuata bəyanatlarla çıxış ediblər. Bu bəyanatlarda iki ölkə arasından əlaqələrin inkişafı üçün perspektiv imkanların geniş olduğu vurğulanıb. Prezident İlham Əliyev Serbiya ilə gələcək əməkdaşlıq üçün zəmin yaradan amilləri qeyd edib. “Həm Serbiya, həm Azərbaycan öz resurslarına arxalanan ölkələrdir, müstəqil siyasət aparan ölkələrdir və bir-biri ilə sıx əlaqədə olan ölkələrdir”,-deyə dövlətimizin başçısı əlavə edib.

 Xatırladaq ki, ötən ay Prezident İlham Əliyev Belqradda səfərdə olmuşdur. Səfər çərçivəsində Belqradda Prezident İlham Əliyevin Prezident Aleksandar Vuçiç ilə geniş tərkibdə görüşü başa çatdıqdan sonra siyasi, iqtisadi, nəqliyyat və digər sahələr üzrə iki ölkə arasında əlaqələrin daha da güclənməsi üçün sənədlərin imzalanması mərasimi olmuşdur. Prezident İlham Əliyev Bakıda verdiyi bəyanatında bu sənədlərlə bağlı işlərin icra olunduğunu qeyd edib: “Şadam ki, əziz dostum mənim dəvətimi qəbul edib və bir ay keçmədən Bakıya səfər edib. Bu onu göstərir ki, əlaqələrimizin dinamikası doğrudan da çox müsbətdir. Biz keçən ay Belqradda qəbul etdiyimiz qərarların tezliklə yerinə yetirilməsini arzulayırıq. Nəinki arzulayırıq və eyni zamanda, hökumət üzvlərinə bu qərarların icra edilməsi ilə əlaqədar müvafiq göstərişlər verildi. Bilirəm ki, bu ay ərzində bizim müvafiq strukturların rəhbərləri bir-biri ilə təmasda olmuşlar və bu gün bu təmaslar davam edir. Bir sözlə, biz istəyirik ki, bundan sonra da ikitərəfli əlaqələr sürətlə inkişaf etsin və qəbul edilmiş qərarlar vaxt itirmədən icra olunsun”.

 Öz növbəsində Serbiya Respublikasının Prezidenti Aleksandar Vuçiçin ölkəmiz və dövlətimizin başçısı haqqında dediyi səmimi sözlər qürurvericidir. Bakı görüşdən gözləntilərinin çox olduğunu deyən Aleksandar Vuçiçin “Həqiqətən də çox xoşbəxtəm ki, Prezident Əliyevdən bu qədər şey öyrənə bilmişəm” fikrini vurğulaması dövlətimizin başıcısının nümunəvi diplomat, müdrik siyasətiçi kimi dünyada qəbul edilməsinin göstəricisidir.

İbrahimova Gülzar İsaxan qızı, Avrasiya Universitetinin Elmi işlər üzrə prorektoru, siyasi elmlər üzrə elmlər doktoru, professor