Dövləti güclü edən ən mühüm amillərdən biri də müasir ordu quruculuğudur. İqtisadiyyatı və ordusu güclü olan ölkə hər zaman uğurları ilə seçilir. Azərbaycan möhkəm və dayanıqlı iqtisadiyyata, yenilməz orduya malik olduğunu 2020-ci ildə Vətən müharibəsindəki Zəfəri, eyni zamanda, postmüharibə dövründə Qarabağda və Şərqi Zəngəzurda apardığı bərpa-quruculuq işləri ilə sübut edib.

Dövlətimizin qarşında duran prioritet məsələlərdən biri də ordu quruculuğunun daha da gücləndirilməsi, hərbi-texniki bazanın təkmilləşdirilməsidir. Çünki mövcud reallıqlar bunu tələb edir. Qarabağın, Şərqi Zəngəzurun bərpası, keçmiş məcburi köçkünlərin doğma torpaqlarına köçürülməsinin tamamlanması vacib məsələlərdəndir. İyunun 23-də Müdafiə Nazirliyinin komando hərbi hissələrinin birində olan və hissəyə Döyüş bayrağının təqdim olunması mərasimində çıxış edən Prezident, Silahlı Qüvvələrin Ali Baş Komandanı İlham Əliyev bununla bağlı bir sıra məqamlara toxundu.

Bu sözləri AZƏRTAC-a açıqlamasında Milli Məclisin deputatı Tamam Cəfərova söyləyib.

Deputat bildirib ki, Azərbaycan Ordusu Vətən müharibəsində düşmənin başını əzdi və onu doğma torpaqlarımızdan qovdu. 30 illik işğaldan sonra ərazi bütövlüyümüz bərpa edildi. Döyüş meydanında məğlub olan Ermənistan üçtərəfli Bəyanatı imzalasa da, hələ də sülh sazişini imzalamaqdan yayınır.

“Dövlətimizin başçısı qeyd etdiyi kimi, mövcud reallıqlar, gərgin geosiyasi vəziyyət bizi diqqətli olmağa, daha da güclənməyə vadar edir. Ermənistan regionda sülhü və sabitliyi təmin edəcək sülh sazişinin imzalanmasını ləngidir. Ermənistandakı revanşist qüvvələr anlamırlar ki, bu saziş daha çox onların ölkəsinə və xalqına lazımdır. Onlar özlərini yaxşı aparmadığı təqdirdə, mütləq yenidən cəzalarını alacaqlar”, - deyə T.Cəfərova vurğulayıb.

Deputat bildirib ki, bu gün bütün dünya ictimaiyyəti, beynəlxalq hüquq Qarabağı Azərbaycanın ayrılmaz hissəsi kimi tanıyır. Amma hər halda biz gücümüzü daha da artırmalıyıq. Çünki təcrübə də göstərir ki, haqq da, ədalət də güclünün yanındadır.

“Azərbaycan 44 günlük Vətən müharibəsindən sonra müasir ordu quruculuğu istiqamətində mühüm tədbirlər və layihələr həyata keçirir. Artıq yeni silahların alınması ilə bağlı müqavilələr də imzalanıb. Müqavilə əsasında ölkəmizə yeni pilotsuz uçuş aparatları və uzaqmənzilli raketlər gətiriləcək. Bu, Azərbaycan Silahlı Qüvvələrinin imkanlarını daha da artıracaq. Bir sözlə, ordumuz güclənməkdə davam edir”, - deyə Tamam Cəfərova bildirib.

Deputat qeyd edib ki, Ermənistan son nəticədə sülh sazişini imzalamağa məcbur olacaq, çünki onun başqa çıxış yolu yoxdur.