"Artıq bir neçə ildir ki, Ermənistan-Azərbaycan münaqişəsi ilə bağlı danışıqlar prosesi gedir. Bu danışıqların son nəticəsi olaraq sülh müqaviləsinin imzalanması ilə bağlı razılaşmalar yolunda addımlar atılır. Bu məsələ yalnız Azərbaycan və Ermənistan hakimiyyətinin gündəmində deyil, eyni zamanda dünyanın aparıcı dövlətləri və beynəlxalq təşkilatların diqqət mərkəzindədir. Əlbəttə ki, Ermənistan-Azərbaycan münaqişəsində bir sıra siyasi güclərin maraqları var. Bu maraqlar çərçivəsində hər ölkə məsələnin özünə sərf edəcək şəkildə həllinə çalışır". Bu sözləri SİA-ya açıqlamasında "Cəmiyyətin İnkişafı Mərkəzi " İctimai Birliyinin sədri Əhməd Abbasbəyli deyib.

Onun sözlərinə görə, bu prosesdə Azərbaycanın tutduğu mövqe aydın və konkretdir: "Azərbaycanın bu istiqamətdə apardığı fəaliyyət yalnız regionda sülhün bərqərar edilməsi və azad olunmuş ərazilərdə vətəndaşların məskunlaşdırılması, abadlıq-quruculuq işlərinin sürətlə davam etdirilərək normal şəraitin təmin olunmasıdır.

Təəssüf ki, Ermənistan tərəfi bu prosesdə dəfələrlə təxribat xarakterli addımlar atıb. Hesab edirəm ki, onun bu addımları artıq ənənə halını alıb. Əslində bunun bir neçə səbəbi var. Düşünürəm ki, Ermənistan tərəfi bu cür təxribatlarla danışıqlar prosesini pozmağa, öz havadarlarının daha çox diqqətini cəlb etməyə və müəyyən güzəştlər əldə etməyə çalışır".

Sədr zözlərinə davam edərək bildirib ki, Ermənistan daxilində də müəyyən problemlər var: "Azərbaycanla razılaşmalar əldə olunacağı vaxtda Ermənistan cəmiyyətində xarici qüvvələrin təsiri ilə hərəkət edən qüvvələr fəallaşır və danışıqlar prosesini pozmağa çalışırlar. Ermənistan hesab edir ki, bu cür pozucu hərəkətləri ilə dünya ictimaiyyətini aldada biləcək. Özləri də dərk etmir ki, Azərbaycanın danışıq proseslərinin ləngidilməsində heç bir marağı yoxdur. Çünki Azərbaycan dövləti artıq istəyinə nail olub və torpaqlarını azad edib. Bizim yalnız bir istəyimiz var. Geri qalan erməni ictimaiyyətinin Azərbaycan dövlətinin qanunvericiliyinə tabe olaraq yaşayışını və 2025-ci ildə artıq rus sülhməramlıları ölkəni tərk etdikdən sonra proseslərə tam şəkildə nəzarət edərək həmin ərazilərdə bütün dövlət strukturlarının fəaliyyətini təmin etməkdir".