Dünyanı heyrətə gətirən, regionun geosiyasi durumunu dəyişən şanlı Zəfərimizdən sonra Azərbaycan dövlətinin qarşısında duran milli prioritetlərdən biri də işğaldan azad etdiyi torpaqların intibahı, onun canlandırılması və tezliklə Böyük Qayıdışı gerçəkləşdirməkdir. Vətən müharibəsindən dərhal sonra start verilən, geniş quruculuq və bərpa işləri bu gün tarixi ərazilərimizdə uğurla davam etdirilərək daha da geniş vüsət almaqdadı. Qarabağa və Şərqi Zəngəzura yenidən həyatın qaytarılması üçün həmin ərazilərdə misli görünməmiş meqalayihələr icra edilir. Bu möhtəşəm prosesin unikallığı həm də ondan ibarətdir ki, quruculuq-abadlıq işləri minalanmış ərazilərin təmizlənməsi kimi həm təhlükəli, həm də sonsuz dərəcədə vacib bir fəaliyyətlə paralel aparılır. Heç bir mənəvi və əxlaqi dəyərlərə, beynəlxalq humanitar hüquqa əhəmiyyət verməyən mənfur düşmənlərin 30 il ərzində işğal altında saxladıqları torpaqlarımızda apardıqları minalama hələ də minlərlə vətəndaşımızın həyatını təhlükədə qoymaqdadır. Vətəndaşlarımızın təhlükəsizliyini təmin etmək, bərpa işlərini genişləndirmək məqsədilə həmin ərazilərin minalardan təmizləmə işləri isə sürətlə davam etdirilir. Bütün bu genişmiqyaslı işlər, o cümlədən Böyük Qayıdış Azərbaycanın öz daxili maliyyə mənbələri hesabına reallaşdırılır.

Bu sözləri AZƏRTAC-a açıqlamasında Cəmiyyətin İnkişafı Mərkəzi İctimai Birliyinin sədri Əhməd Abbasbəyli söyləyib.

O bildirib ki, işğal müddətində Qarabağda və Şərqi Zəngəzurda nəinki bütün infrastruktur tamamilə dağıdılıb, həmçinin ətraf mühit ciddi zərər görüb. Bu mənada həm infrastrukturun yenidən qurulmasına, həm də ətraf mühitin bərpasına, yaşıllıqların, meşə massivinin salınmasına, çayların təmizlənməsinə də ehtiyac var və bu istiqamətdə də intensiv işlər görülür.

“Erməni vəhşilərinin yerlə-yeksan etdiyi qədim yaşayış məskənlərimizin bərpası, yolların, tunellərin, beynəlxalq hava limanlarının inşası və digər kommunikasiya sistemlərinin, bütün infrastrukturların yaradılması Şərqi Zəngəzur və Qarabağa yenidən həyatın qayıdacağına, Böyük Qayıdışın reallaşacağına, 30 ilə yaxın məcburi köçkün həyatı yaşamış soydaşlarımızın tezliklə öz doğma ata-baba yurdlarına qovuşacaqlarına və firavan yaşayacaqlarına inam hissini daha da artırır. Əslində, Qarabağda və Şərqi Zəngəzurda aparılan bu möhtəşəm işlər, regiona yeni nəfəsin verilməsi, Azərbaycanın 30 illik işğala son qoyan Zəfər yürüşünün davamı olaraq, bir daha dövlətimizin gücünün, qüdrətinin, vətəndaşlarımızın yurd sevgisinin, əzmkarlığının, zəhmətsevərliyinin, iradəsinin, peşəkarlığının bütün dünyaya nümayişidir”, - deyə QHT sədri vurğulayıb.