1 sentyabr 2024-cü ildə keçirilən növbədənkənar parlament seçkilərində iştirak edən deputatlığa namizəd Susana Məmmədova siyasi mədəniyyət nümayiş etdirərək seçkidə qələbə qazanan Azərbaycan-Türkiyə Evinin rəhbəri, Vətəndaş Həmrəyliyi Partiyası sədrinin müşaviri Tənzilə Rüstəmxanlını təbrik etmək etmək üçün onun Neftçala şəhərindəki qərargahını ziyarət edib. 

 Tənzilə Rüstəmxanlının seçki qərargahının üzvləri nümayiş etdirdiyi siyasi mədəniyyətə görə Susana Məmmədovanı alqışlarla qarşılayıblar. 

Görüşdə çıxış edən Tənzilə Rüstəmxanlı siyasi mədəniyyət nümayiş etdirdiyi üçün Susana Məmmədovaya təşəkkür edib. O bildirib ki, hər zaman qardaş Türkiyədə seçkilərdən sonrakı proseslərə nəzər yetirdikdə namizədlərin siyasi mədəniyyət nümayiş etdirdiyini heyranlıqla izləyib və Azərbaycanda da eyni tendensiyanın təkrarlanmasını arzulayıb:

“Çox şükürlər olsun ki, artıq Azərbaycanda da siyasi mədəniyyət formalaşır və bu gün biz bunu Susana xanımının timsalında gördük. Buna görə bir daha Sizə dərindən təşəkkürümü bildirirəm”.

Seçki dönəmində bəzi namizədlər tərəfindən çox haqsızlıqlar, yalan, böhtan, iftiralarla üzləşdiyini deyən Tənzilə Rüstəmxanlı, Susana Məmmədovanın isə bütün bu intriqalar, qarayaxma kampaniyasından uzaq olduğunu və sağlam bir mübarizə apardığını diqqətə çatdırıb:

“Hətta seçki ərəfəsində mənə məlumat verdilər ki, seçki lövhələrindən birində mənim şəklimi kimsə cırıb. Ancaq həmin vaxt orada olan Susana xanımın nümayəndəsi həmin şəkili yenidən yerinə yapışdırıb. Budur siyasi mədəniyyət, budur əxlaq, budur sağlam seçki mübarizəsi”.

Sonra çıxış edən Susana Məmmədova əvvəlcə qələbə münasibətilə Tənzilə Rüstəmxanlını təbrik edib. Ona qanunvericilik fəaliyyətində uğurlar arzulayıb:

“Mənim üçün bir təcrübə, eyni zamanda qürur idi ki, Tənzilə xanım kimi ziyalı, vətənpərvər bir xanımla seçki mübarizəsinə qoşulum, onunla rəqib olum. Mən ilk gündən bu mübarizəyə sağlam formada, bütün intriqalardan kənar qalmaqla qoşuldum. Çünki bu bir siyasi mübarizədir. Bu mübarizəni elə aparmalıyıq ki, sabah üz-üzə gələndə utanmayaq, bir-birimizdən kənar qaçmayaq. Tənzilə Rüstəmxanlı da məhz eyni prinsiplərdən mübarizə aparıb seçkinin qalibi olduğu üçün onu təbrik etməyi özümə borc bildim. Bir daha Sizi qələbə münasibətilə ürəkdən təbrik edir, qanunvericilik fəaliyyətində uğurlar arzulayıram”.

Gecənin ikinci yarısının sürpriz qonağı isə Neftçaladan digər namizəd Qəhrəman Tahirov olub. O, Tənzilə Rüstəmxanlının seçki qərargahına gələrək, qalibi təbrik edib, gələcək fəaliyyətində uğurlar arzulayıb.