Azərbaycanın Özbəkistandakı səfirliyi və onun nəzdindəki Heydər Əliyev adına Azərbaycan Mədəniyyət Mərkəzi “Wyndham Tashkent” otelində Azərbaycanın Zəfər Günü ilə bağlı qəbul keçirib.

Tədbirdə Özbəkistan Xarici işlər nazirinin müavini Batır Usmanov, parlamentin üzvləri, hökumət nümayəndələri, səfirlər və beynəlxalq təşkilatların təmsilçiləri, paytaxtdakı diplomatik qurumların hərbi attaşeləri, elm, mədəniyyət və incəsənət xadimləri, jurnalistlər, Azərbaycan diasporunun üzvləri iştirak edib.

Əvvəl iştirakçılar otelin foyesində Azərbaycan xalqının zəfərinə həsr edilmiş fotosərgiyə baxıblar.

Azərbaycanın və Özbəkistanın dövlət himnləri səsləndikdən sonra ölkəmizin Özbəkistandakı səfiri Hüseyn Quliyev qonaqları salamlayaraq Zəfər Günü haqqında ətraflı məlumat verib. Səfir deyib ki, Azərbaycanın Vətən müharibəsindəki Qələbəsi bizim üçün həm də milli qürur, qəhrəmanlıq və yenilməzlik simvoludur. 30 ilə yaxın Qarabağ və ona bitişik rayonlar işğal altında qalıb. Bununla belə ordumuzun şücaəti və xalqımızın qətiyyəti sayəsində biz öz torpaqlarımızı qaytardıq və tarixi ədaləti bərpa etdik. Zəfər Günü bir daha sübut edir ki, Azərbaycan torpaqlarını, şəhər və kəndələrimizi, alınmaz qala olan Şuşamızı qanı, canı bahasına qaytaran igid oğullarımızın qanı yerdə qalmayııb, Vətən uğrunda canını fəda edən igidlər daim qəlbimizdə yaşayacaq.

Səfir bildirib ki, Azərbaycan Prezidenti İlham Əliyevin rəhbərliyi ilə ordumuz yüksək professionallıq və qətiyyət göstərdi, məhz onun rəhbərliyi ilə biz qələbə çaldıq, ərazi bütövlüyümüzü bərpa etdik, Azərbaycanın əvvəlki şöhrətini qaytardıq.

H.Quliyev deyib:-İşğaldan azad etdiyimiz torpaqlara gələn xarici jurnalistlər və qonaqlar Ağdamı Azərbaycanın Xirosiması adlandırıb. Azərbaycan dəfələrlə UNESCO nümayəndələrini Qarabağa dəvət edib ki, onlar Azərbaycanın ermənilər tərəfindən dağıdılan mədəni irsini, vəhşi düşmən münasibətini öz gözləri ilə görsünlər. Dəfələrlə müraciət etməyimizə baxmayaraq UNESCO Qarabağa nümayəndələr göndərməyib. İşğala qədər Qarabağ torpağında olan 67 məscidin 65-i ermənilər tərəfindən dağıdılıb, iki məsciddə isə donuz saxlayıblar. Bakıdakı erməni kilsəsi isə bu günə qədər qorunub saxlanıb, üç il əvvəl isə digər konfessiyalara məxsus kilsələr kimi restavrasiya edilib.

Diplomat vurğulayıb ki, Azərbaycan xalqı müharibə dövründə öz dəstəyini əsirgəməyən Özbəkistan dövlətinə və xalqına öz dərin minnətdarlığını bildirir.

Tədbirin bədii hissəsində Özbəkistanın və Azərbaycanın Xalq artisti Fərrux Zakirov və Azərbaycanın və Özbəkistanın Xalq artisti Gülyanaq Məmmədova Azərbaycan və özbək mahnıları ifa ediblər. Onların ifaları alqışlarla qarşılanıb.

Sonra mərasim iştirakçıları Azərbaycan milli yeməklərinə qonaq edilib.