Prezident İlham Əliyev: “Bu gün Azərbaycanın hər bir yerində Dövlət bayrağı dalğalanır”

 Azərbaycan Respublikasının Dövlət Bayrağı xalqımızın tarixən formalaşmış milli kimliyinin, dilinin, mədəniyyətinin və ənənələrinin təcəssümüdür. Bayraq, həmçinin Azərbaycanın müstəqillik uğrunda apardığı mübarizənin, qəhrəmanlıq tarixinin və keçdiyi tarixi mərhələlərin xatırladılmasıdır. Bayrağın hər bir rəngi — mavi, qırmızı və yaşılı — xalqın birliyi və gələcəyi üçün əhəmiyyətli dəyərləri ifadə edir. Azərbaycan Xalq Cümhuriyyətinin üçrəngli Dövlət Bayrağı 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın Ümummilli Lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının Dövlət Bayrağı olaraq təsdiq edilmişdir. Bayraq, Azərbaycanın müstəqilliyinin, suverenliyinin və dövlətçiliyinin qorunması və inkişafı məqsədilə hər zaman xalqın bir arada olmasını tələb edir. Dövlət bayrağının qorunması, onun önəmini daha da artırır və ölkənin dövlətçilik simvolu olaraq gələcək nəsillərə ötürülməsi baxımından əhəmiyyətlidir. Bayrağın altında birləşmək, Azərbaycanın müstəqilliyinə olan hörmətin və sevgisinin göstəricisidir. Azərbaycan Respublikası Prezidenti İlham Əliyevin 2009-cu il noyabrın 17-də imzaladığı Sərəncamla hər il noyabrın 9-u ölkədə Dövlət Bayrağı Günü kimi qeyd edilir. Azərbaycan Respublikası Əmək Məcəlləsinin 105-ci maddəsinə əsasən bu bayram ölkədə qeyri-iş günü olan bayramların siyahısına daxil edilib. Bu gün ölkənin milli həmrəyliyi və dövlətçiliyinin simvolu kimi böyük əhəmiyyət kəsb edir. Dövlət bayrağının qəbul edilməsi, Azərbaycan xalqının müstəqillik, azadlıq və dövlətçilik ideallarına sadiqliyini simvollaşdırır. Bu günün milli həmrəylikdəki rolu çoxşaxəlidir və aşağıdakı əsas məqamları əhatə edir. Dövlət bayrağı Gününün qeyd olunması, ölkə daxilində müxtəlif etnik qruplar, mədəniyyətlər və inanc sahibləri arasında birliyi və həmrəyliyi təşviq edir. Bayraq, Azərbaycanın multikulturalizminə, müxtəlifliyi qəbul etməsinə və eyni zamanda vahid bir millət olaraq birləşməsinə işarə edir. Bayraq hər bir Azərbaycan vətəndaşının ortaq dəyəridir və bu dəyər ətrafında müxtəlif fərqliliklərə baxmayaraq, xalqı birləşdirir.

Dövlət Bayrağı Günü, vətəndaşları öz ölkələrinə və dövlətlərinə qarşı məsuliyyətli və sadiq olmağa çağıran bir gündür. Bayrağa hörmət, həmrəyliyin və ölkənin sabahına olan ümidin simvoludur. Bu gün, Azərbaycan vətəndaşlarının dövlətə bağlılıqlarını bir daha qeyd etmələri, dövlətin həyata keçirdiyi layihələrə və siyasətə dəstək olmaları üçün əhəmiyyətli bir fürsətdir. Bu baxımdan gənc nəslə vətənpərvərlik ruhunu aşılamaq üçün bayrağımızn təbliğ olunması önəmlidir. Bayraq, gənclərə öz ölkələrinə və dövlətlərinə xidmət etməyin vacibliyini xatırladır və onların milli dəyərlərini mənimsəməsinə kömək edir. Bu gün, gənclərin Azərbaycan bayrağının altında birləşməsi və ölkənin gələcəyi üçün daha da güclü bir birlik yaratmaq məqsədini daşıyır. Ulu Öndər Heydər Əliyev dövlət bayrağımıza sayğı və ehtiramın əhəmiyyəti haqqında demişdir: “Gərək hər bir evdə Azərbaycan Dövlətinin Bayrağı olsun, hər bir ailə Azərbaycan bayrağına itaət etsin. Bu bayraq tək rəsmi yerlərdə yox, idarələrdə, küçələrdə, saraylarda, məktəblərdə yox, gərək hər bir ailənin həyatının əziz bir hissəsi olsun”.

Dövlət Bayrağı Günü, həm də Azərbaycanın beynəlxalq aləmdə öz mövqeyini gücləndirmək və dünya ölkələri ilə əlaqələrini möhkəmləndirmək üçün bir vasitədir. Bayraq, Azərbaycanın müstəqil bir dövlət olaraq beynəlxalq təşkilatlarda, diplomatik müstəvidə özünü tanıtmasının və güclü siyasi və iqtisadi əlaqələr qurmasının simvoludur.

 Bayrağımız Azərbaycanın tarixi, mədəniyyəti, müstəqilliyi və gələcəyinə olan bağlılığın simvolik bir ifadəsidir. Bu günün qeyd olunması, ölkə daxilində və xaricində milli həmrəyliyin, vətənpərvərliyin və dövlətə olan sevginin təbliğinə xidmət edir. Dövlət bayrağının altında birləşmək, Azərbaycan xalqının gücünü və birliyini təcəssüm etdirir, vətənə olan bağlılığı möhkəmləndirir. 2010-cu il sentyabrın 1-də Bakıda Dövlət Bayrağı Meydanının təntənəli açılış mərasimində Azərbaycan Respublikasının Prezidenti İlham Əliyev Dövlət Bayrağının xüsusi əhəmiyyətini vurğulayaraq deyib: “Bizim bayrağımız qürur mənbəyimizdir. Bizim bayrağımız canımızdır, ürəyimizdir. Bu gün Azərbaycanın hər bir yerində Dövlət bayrağı dalğalanır. Azərbaycan ərazi bütövlüyünü bərpa edəndən sonra milli Dövlət bayrağımız bu gün hələ də işğal altında olan torpaqlarda qaldırılacaqdır. Bizim bayrağımız Dağlıq Qarabağda, Xankəndidə, Şuşada dalğalanacaqdır. O günü biz hər an öz işimizlə yaxınlaşdırmalıyıq və yaxınlaşdırırıq. Eşq olsun, Azərbaycan bayrağına!”.

44 günlük Vətən müharibəsi günlərində xalqımızın dövlət bayrağımıza sevgisi bir daha müşahidə olundu. Müharibə bitdikdən sonra, bayraq, yalnız fiziki ərazi bərpa olunmaqla qalmadı, həm də xalqın mənəvi və ideoloji birliyini göstərdi. Bayrağın Şuşada, Laçında, Kəlbəcərdə və digər işğaldan azad olunan torpaqlarda qaldırılması, yalnız Azərbaycanın müstəqilliyi və ərazi bütövlüyü ilə bağlı deyil, həm də xalqın qalibiyyətə inamının və mübarizə əzminin ifadəsi idi.

Həmin günlər bayrağımız Azərbaycanın qalibiyyətinin və birliyinin simvoluna çevrilmişdir. Həm cəbhə bölgəsində döyüşən əsgərlər, həm də arxa cəbhədə olan mülki vətəndaşlar bayrağa qarşı sonsuz sevgi və hörmət hissi ilə yanaşmışdır. Vətən müharibəsi zamanı bayrağın önəmli rolu, milli birliyin və həmrəyliyin simvolik və praktiki bir ifadəsi olmuşdur.

Azərbaycan Respublikasının Dövlət Bayrağı cəmiyyətin müxtəlif təbəqələri arasında fərq qoymadan, hər bir azərbaycanlının vətənə bağlılığını əks etdirir. Bu gün müxtəlif rəsmi tədbirlərdə bayrağın ön planda olması, onun milli həmrəyliyin rəmzi olduğunu bir daha sübut edir.

Rüstəmova Aybəniz Vilayət qızı, Avrasiya universitetinin Humanitar fənlər və regionşünaslıq kafedrasının müdiri, tarix üzrə fəlsəfə doktoru, dosent